Page Text
________________
मणोरमा-कहा
इय एवं बहुसो रोइऊण परिचितियं तए हियए। अलमिमिणा रुण्णणं अप्पडियारेण रणम्मि ॥५९७।। मरणेण विणा सीलं संपइ परिपालिउं न सक्कमि । इय चितिऊण तुमए वत्थेण विणिम्मिओ पासो ॥५९८।। दाऊण कंधराए गया लहुं वउलपायव-समीवे । सच्चविया जम-पहवत्तिणि व्व दढ-पत्तला साहा।।५९९।। भत्तिभरनिब्भराए तुमए सरिऊण जिणनमोक्कारं । भणिया पवयण-देवी जइ किपि कयं मए सुकयं ।।६००। ता अण्ण म्मि विजम्मे करेज्ज मह सीलरक्खणे जत्तो। मा होज्ज पूणो एवंविहाण दुक्खाण संभई ॥६०१।। एवं भणिऊण तए उब्बंधिय जाव मुक्कओ अप्पा । तावदुद्दीणे जीवियम्मि गयणे सुओ सद्दो ॥६०२।। मा रुयसु भइणि ! सुरसुदरो अहं खयरो परिभमंतो। सोऊण रुइयसई गयणाओ तुह इहं पत्तो ।।६०३।। एवं पयंपिऊणं छिण्णो छुरियाए पासओ तेण । सित्ता सलिलेण तओ सत्थावत्था तुमं जाया ।।६०४।। एत्थंतरम्मि कड्ढिय करवालो जमभडो व दुप्पेच्छो। आगच्छंतो दिट्ठो सिद्धो भयवेविरंगीए ।।६०५।। भणिओ खेयरकुमरो तुमए वाहजल-भरिय-नयणाए । भाउय ! अवसरसु तुम एस दुरप्पा समासण्णो।६०६। सो वि भणिऊण कि भीरु भाषसे सरसु जिणनमोक्कारं । गहियासि-खेडओ हक्किऊण तस्सम्मुहो चलिओ। सो विहु वियडविडंबियवयण-विणिस्सरियजलणजालोहो। रवि-कर-संवलिय-कराल-कढिण-करवालकयहत्थो। अइगरुयदप्प-निव्वरओट्ठो भिउडी-भीसणो धणियं । पत्तो खेयर-सविहं हक्कारव-पुरियदियंतो ॥६०९।। खयरेण विखग्गं कड़िढऊण रूसिऊण सो इमं भणिओ। रे पाव! परकलत्तं-अवहरसि न लज्जिओ होसि ।६१०। अलि-गवल-सजलहरतमाल-कलयंठि-कज्जल-च्छाओ। अह वाहिओ किवाणो सिद्धेणं खेयराभिमुहो ।।६११।। खयरेण वि णिय दक्खत्तणेण तं वंचिऊण रु?ण । खरखग्गपहारेणं पहओ सिद्धो पहट्ठण ।।६१२।। मुच्छानिम्मीलियच्छो घुम्मावियलोयणो य कंपतो । मयपोरुसाभिमाणो पुव्वाभिमुहो पणट्ठो सो ।।६१३।। विज्जाहरो वि मग्गाणुलग्गओ तस्स ताव संचलिओ। जावेगसरं निम्मल-जल-पडिपुण्णं परम-रम्मं ।।६१४।। जं हंस-कुरर-कारंड-चक्क-सारस-सएहि संछण्ण । भमर-भरोण्णय-पंकय-रय-रंजिय-परि-पेरंतं ॥६१५।। तस्स सलिलंतराले सहसच्चिय चंडकुंडलो लीणो । काऊण दयं विज्जाहरो वि तुह सम्मुहो चलिओ ।६१६। आणंद-वियसियच्छो लद्धजओ तुह समीवमागम्म । पभणइ खयरो काऊण अंजलि एरिसं वयणं ।।६१७।। निज्जिणिओ सो पावो संपइ सीलुज्जले भणसु । कज्जं जं कायब्वमणेणं जणेण नियभाइ-तुल्लेण ।।६१८।। तो हरिसियचित्ताए तुमए सो खेयरो इमं भणिओ। परकज्ज-करण-निरओ को वा अण्णो तुह सरिच्छो।६१९। निरवच्चयाए जणियं जं दुक्खं आसि मज्झ हिययम्मि । संपइ तुमम्मि दिट्ठ तंपि पणट्ठ महाभाग ।।६२०।। तत्तो तुह पुत्तट्ठा पण्णत्ती सुमरिया नहचरेण । आगम्म सा पयंपइ भण पुत्तथ ! जं मए कज्ज ।।६२१।। भणियं च तेण भयवइ मह भइणीए जहा सुया दुण्णि । एगा सुथा य जायइ जयपयडा तह करेज्जासु ।।६२२।। पण्णत्तीए भणियं होही इय न · एत्थ संदेहो। गिण्ह इमं हारदुर्ग इमं च रयणालि वच्छे ! ॥६२३।। एवं भणियतक्खणा सा पण्णत्ती पाविया नियं ठाणं । खयरेण तुम भणिया पुणोवि भण भइणि! जं करेमि।६२४। पडिभणिओ सो तुमए मह कायव्वं ताए कयं सव्वं । संपइ करेसु एयं पावेसु पुरंदरं नयरं ।।६२५।। वरवत्थाहरणाई दाऊण पहट्ठमाणसो खयरो। गहिऊण तुमं पत्तो पुरंदरं सेट्ठि-भवणम्मि ।।६२६।। कहिऊण य वुत्तंतं सव्वं सेटिस्स तेण कय-पूओ। संभासेइ तुमं पि हु सणियं सुरसुंदरो मुइओ ॥६२७।। नेहभरमिब्भराए वाहजलुप्पील-भरिय-नयणाए । कहकहवि खलंतक्खरक्खीणसरं जंपियं तुमए ।।६२८।। तं सामी तं बंधू तं माया तं पिया गुरु तं च । मह सील-रक्खगो तं तुमं च मह पाण-दाया य ।।६२९।।
_Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |