Page Text
________________
सम्मत्त-बीय-लंभो णाम पढमो अवसरो तत्थ य धणदेवकहाणए सीलवईकहा
उवजुजिऊण भयवं ओहिन्नाणेण मुणियपुत्वभवो । सजलघणगहिरसद्देण य भणइ मोहं पणासितो ।।५६४।। अत्थेत्थ भरहे खेत्ते पुर-पहाणं पुरंदरं नयरं । तत्थासि बहुधणो धणवइ व्व नरवाहणो सेट्ठी ।।५६५।। तस्सासि तुमं घरिणी अइप्पिया सीलसुंदरी नाम । देव-गुरु-पायपंकयपणामपूयारया निच्चं ।।५६६।। अह अण्णया कयाइ अदिट्टपुत्त सुहदुत्थिओ सेट्ठी। पभणइ तुममेगते सदुक्खमेयारिसं वयणं ।।५६७।। पाणेहितो वि पिया सुंदरी तं मज्झमाणिणि जाया । जं पुण अवच्च-रहिया तेण मणे कुणसि बहुदुक्खं ।।५६८।। मोत्तुं जिण-वंदण-पूयणं च गुरु-चलण-कमल-सेवं च । सेससमयम्मि दुहिओ वसामि नरए व्व ने रइओ ।।५६९।। अट्ठाणकुविय-दुज्जण-जण-संलवियकडुय-वयणाई। न तहा मिति ममं जह निरवच्च त्ति जण-सहो ।।५७०।। पडिभणिआ सा तुभए एअं न हु दुव्वारकारणं नाह । अवि य गणाणं ठाणं वामोहनिरोहओ भणियं ।।५७१।। उप्पण्णो वि हु पुत्तो जइ विणय-विवज्जिओ हवइ कहवि। तो अम्मापियराणं जाजीवं देइ मणदुक्खं ॥५७२।। अह पुत्तत्थे पिययम ! निब्बंधो ता मए अणण्णाओ । परिणेसु अण्णभज्ज जहिच्छियं किं वियारेण ?।।५७३।। सो आह पिए दुक्खं पुच्छिज्जइ चित्तनिव्वुइनिमित्तं । पुत्तम्मि संसओ ताव तुम्ह कलहो निओगेण ।।५७४।। होही सावक्क-कओ घरवारो जेण होइ दुहवासो। जइ नेहेणं वट्टह करेमि एवं पिता सुयणु ।।५७५।। हसिऊण तए भणियं नवरंगपिओ न होसिजइ नाह ! ता कलहो वि न होही एगावरियम्मि भोयम्मि ।।५७६।। पडिवज्जिऊण एयं परिणीया तेण सुलस-सेट्ठि-सुया । नामेणं विणयवई वियार-कुसला जिण-मयम्मि ।।५७७।। एवं वच्चंति दिणा विणयवईए वि होइ न ह पुत्तो । सविसाओ नरवाहण-सेट्ठी अइवाहए कालं ।।५७८।। अण्णम्मि दिणे पासाय-सिहर-मणिमंचए समारूढा । गयणयल-संठिएणं विज्जासिद्धण तं दिट्ठा ।।५७९।। अवयरिउं गयणाओ सप्पणयमिणं पयंपिअं तेण । मयण-सरसल्लिएणं तुह रूवाखित्त-चित्तेणं ॥५८०।। सुंदरि ! विज्जासिद्धो सु[रसिद्धो चंदकुंडलो अयं । तुह रूवाइ-गुणेहि अवहिय-हियओ इहं पत्तो।।५८१।। मयणग्गि ताव तवियं नियंग-संगामएण मह देहं । पसयच्छि ! पसिय सिग्घं निव्वावसु मा चिरावेहि ।५८२। एवं पयंपमाणे वि तम्भि नो उत्तरं तए दिण्णं । कुविएण तेण तत्तो उक्खित्ता नहयलाभिमुही ।। ५८३।। हा अज्ज उत्त ! हा अज्जउत्त ! केणावि पेच्छ निज्जामि । इय दीणवयण-पूरियनहंगणा अवहडा तेण ।५८४। नेऊण सज्झ-पव्वय-वहंत-वाहिणि-समहरमणीए । एगम्मि वण-निगुंजे मुक्का सहस त्ति धरणीए ।।५८५।। तो भणइ पणयपुव्वं तत्थ तुम चंदकुंडलो भद्दे ! अज्ज वि न कि पि नट्ठ मह वयणं कुणसु इण्हिं पि ॥५८६।। सुंदरि ! नीसेस-पसिद्ध-सिद्ध-सिरिमउड-घडिय-चलणस्स । मज्झ पसाएण तुमं भुंजसु हिय-इच्छिए भोए ।५८७। तुह सुह-सुहिओ तुह दुक्ख-दुक्खिओ तुज्झ हियय-गय-हियओ। जं भणसि तयं सव्वं भिच्चो व्व अहं करिस्सामि तुमए भणियं जइ कुणसि मज्झ वयणं तुम नियमेण । ता पढम चिय कीरउ अकज्जमेयं न कायव्वं ।।५८९।। जम्हा दुलहं लोए मणुयत्तमिणं कहिं पि मे पत्तं । तत्थ वि जाइ-कुलाई तेसु वि जिणदेसिओ धम्मो ।।५९०।। निसुयं पवयणसारं पइदियहं गुरुयणे कया भत्ती । मोक्ख-तरु-बीय-भूयं सम्मत्तं पावियं परमं ॥५९१।। परिपालियं च सीलं गुरूवएसपरिपालण-जलेण । पक्खालिऊण पायं पावमलो दुक्ख-सयहेउ ॥५९२॥ इण्हि अकज्जमेयं करेमि हं कहसु दुग्गइ-दुवारं । तुज्झ वि न चेव जुत्तं मज्जायविलंघणं काउं ॥५९३।। नाऊण निच्छयं तुह कोवारुणलोयणो गओ सिद्धो । खग्गाणयणनिमित्तं पच्चासण्णे वण-निगुंजे ॥५९४।। हा ताय ! अंब ! हा अज्जउत्त ! समसोक्ख-दुक्ख हा भाय ! वसण-समुद्द-निवडिया भण के सरणं पवज्जामि हा भयवइओ ! वणदेवयाओ ! रक्खेह मज्झ सील-धणं । तुम्ह सरणं पवण्णा जं जाणह तं करेहिहि ॥५९६।।
_Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |