Page Text
________________
७८
मणोरमा-कहा
तओ भयसंभंतलोयणाहि पवणाहयपण्णं व पवेविर-सरीराहि समकाला विमुक्कपोक्काहिं मरण-भय-संखुद्धाहिं खलंतक्खरं जंपियं ताहि-"अहो अपुरिसा पुहई । कहमण्णहा एवं निरवराहा मारिज्जामो।" तं सुणिय वियड-पय-पायसमक्कत-सिग्ध-धरणीतलो 'न भाइयव्वं, न भाइयव्व' ति, भणतो पत्तो तमुद्देसं खेमकर-नराहिवो । हक्किओ कावालिगो। भणियं कावालिगेण-"रे कुविय-कयंत-समवलोइय ! कओ तुम इहागओ। अणुहवसू अविणयफलं" ति भणतेण मुक्को खग्गप्पहारो। वंचिओ दक्खत्तणेण राइणा । पहओ दाहिण-भूया मूले कुलिस-कढिण-मुट्रिप्पहारेण । पडियं कंपंत-कशओ करवालं कावालिगस्स । विलक्खावण]यण-निमित्तं पसंसिओ राइणा-“अहो ! ते साहसं । पूणो वि सरेस सत्थं ।" तेण भणियं-“अलं सत्थेण । दिट्ठो तुहाणुभावो । परं पत्थिमो किपि भवंतं ।" राइणा भणियं-“थी-वहं वज्जिय पत्थेसु ।" तेण भणियं-“एयम्मि अवसरे एयं चेव पत्थेमि ।" जओ कया मए छम्मास जाव पुव्वसेवा । अज्ज उण उत्तर-सेवावसरो । तत्थ पुण एस कप्पो-'बहु लक्खण-विराइयमंगाहिं पहाणरायवंससंभवाहि छहि कण्णगाहिं छण्हं पि दिसाणं बली दायव्वो । अओ मए मंतागरिसणेण इमाओ कण्णगाओ सुतारा-सुलक्खणा-वियक्खणा-पियदसणासूदसणाभिहाणाओ आणीयाओ । संपयं सिद्धपायं पओयणं । ता मा तुमंतरायं करेसु ।” राइणा भणियं-"एवं कए का भवउ कज्जसिद्धी ?" तेण भणियं-“सयल-कल्लाग-कारिणी भयवई जक्खिणी पयडी भविस्सइ ।" राइणा भणियं--- "जइ रज्जत्थी तो देमि मेइणी, पवर कामभोगे वा अण्णं पि जमभिरुइयं तं मग्गसु पयडवायाए । किंच-- अण्णेसि पि अकज्ज, कज्जमिणं तिक्खदुक्खभयहेऊ । परम पावट्ठाण, कत्थ मुणो कत्थ इथिवहो ।।४२७ ।। विबुहजणगरहणिज्ज उभयभवविबाहगं कुकम्ममिणं । सहसा समायरंतो नरए नियमेण निवडेसि ।।४२८।। ता विरमिय एयाओ, करेसु, धम्म दयावरो संतो । जेण किलसेण विणा, कल्लाण-परंपरं लहसि ।।४२९।।
तओ लज्जाभरमंथरेण कुकम्म-करणसमुप्पण्ण-पच्छायावेण जंपियं कावालिगेण-"महाभाग ! अलं मे अण्णणं । अपहपत्थिओ ओयारिओ अहं तए धम्ममग्गे ता गिण्हसु इमं दुरावट्रिय-वत्थूणो आगरिसण-समत्थं पढिय-सिद्ध मंतं । अहं पि सिरिपव्वए गंतूण धम्मुज्जम करेमि । अण्णहा न मे मणनिव्वुई।" मुणिऊण निच्छ्यं गहिओ मंतो। भणिओ राया कावालिगेण--"एयाओ तए अम्मा-पिऊण समप्पियव्वाओ।" रण्णा भणियं---"अम्हाण एस भारो। साहेउ भवं समीहियं ।" गओ कावालिगो। राइणा वि महुरुल्लावजणिय-विस्संभेण पुच्छ्यिाओ कण्णगाओ वइयरं । संभम-खलंतक्खरं गलत-नयण-सलिलाहि जंपियमिमाहि-“सव्वं साहिस्सामो। केवलं करेह ताव गंधव्व-विवाहेण पाणिग्गहणं अम्हाण।" राइणा भणियं-"अम्मापिअरेहि दिण्णाओ चेव कण्णगाओ परिणिज्जंति ।" ताहि भणिअं---"वोलीणा चेव तावेसा कहा।" रण्णा भणियं-"कहं वोलीणा?" ताराए भणिअं--'अहं ताव दक्खिणावहे मलय-विसयमंडण-मंगलपुर-सामिणो मलयकेउ-नरवइस्स धूया। धवलहरोवरिमतल-भूमियाए रयणीए चेव सुहपसुत्ता इहाणीया।" सुताराए भणियं-"अहं पि पुवदिसावहू-मुह-मंडणाए कुंडिणपुरीए सामिणो नरसीहस्स दुहिया सुह-पसुत्ता चेव आणीया ।" सुलक्षणाए भणियं"अहं उत्तरावहे सुहनिवासनयरसामिणो हरिसेण-नरिंदस्स तणया सूह-पसूत्ता चेव आणीया । वियक्खणाए भणियं"अहं पुण अवरदिसासारभूय-सुसम्मपुर-सामिणो विलासकित्तिणो तणया तहेव आणीया ।" पियदंसणाए भणियं--"अहं वियड्ढ-नगाओ उत्तरसेणि-सामियस्स अणंतविरियाभिहाणस्स विज्जाहर-चक्कवट्टिणो दुहिया सुत्ता चेव आणीया"। सुदंसणाए भणियं--"अहं वेयड्ढ-दाहिणसेणिसामिणो विक्कमसारस्स विज्जाहराहिवस्स दुहिया सुत्ता चेव आणीया।" ता कहिं अम्हाण गुरुयणसमागमो?" रण्णा भणियं--"जइ भणह तो इहेव संठियाणं आणेमि तुम्हाण गुरुजणं मंतसत्तीए।" ताहिं भणियं--"जइ एवं भवइ तो सव्वं सुंदरं भवइ।" सुमरिओ रण्णा आगरिसण-मंतो। समागया तक्खणा चेव ताण अम्मा-पियरो। दिट्ठाओ निय-निय दुहियाओ। पुच्छियाओ य "को एस वइयरो? को वा एस आयारमुणिज्जंत-महापुरिस-लक्खणो पुरिसो?" कहिओ ताहि कावालिग-हरण-मारणरंभ-पज्जवसाणोनिय वइयरो।" एस पुण महाणुभावो अम्हाण जीविय-दायगो। ता जइ अम्हे अण्णस्स वि दायव्वाओ ता एयस्स चेव देह ।" तेहिं वि तहेव पडिवण्णं । कओ तक्खणा चेव गंधव्व-विवाहो। मंत-पओगेण चेव पाविया सद्राणं ताण जणणि-जणया वि । चरिमजामे गओ निया
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |