________________
त्रयोदशं चित्र-संभूतीयमध्ययनम्
इतश्च चित्र-सम्भूतौ गान्धर्व्यादिकलावरौ । जनैस्तच्छ्रवणासक्तैः सह गीतानि गायतः ॥२४॥ सदा ताववजानन्तौ स्पृश्यास्पृश्यविभागताम् । राज्ञा पुरप्रवेशादौ धर्षयित्वा निषेधितौ ॥२५।। पौरेषु मिलितेषूच्चेरन्येद्युः कौमुदीक्षणे । प्रवृत्तौ मधुरं गातुं रञ्जितानेकनागरौ ॥२६।। त्रिवेद्यादिद्विजैदृष्टौ स्पृशन्तौ जनतां शुभाम् । काष्ठ-लेष्ट्वादिभिः सर्वैस्तावत्यर्थं कर्थितौ ॥२७॥ एवं तौ हन्यमानौ द्राक् पुरादुद्यानमीयतुः । खिद्यमानौ दुर्मनस्कौ दध्यिवांसाविति स्फुटम् ॥२८॥ रूप-तारुण्य-लावण्यं कला-कुशलतादि च । धिगस्त्वस्माकमखिलं मातङ्गकुलसम्भवात् ॥२९।। अनुक्त्वा स्वजनादीनां प्रस्थितौ दक्षिणापथम् । विरक्तचित्तौ यामिन्यां मुमूर्षाकृतनिश्चयौ ॥३०॥ दूरदेशान्तरं प्राप्तौ शेलमेकमपश्यताम् । तमारुहन्तावेकस्मिन् शिलापट्टे तपस्विनम् ॥३१॥ तपःकृशीकृतस्वाङ्गं ध्यानसंलीनमानसम् । प्रलम्बितभुजद्वन्द्वं मुनिमेकं ददर्शतुः ॥३२॥ युग्मम् ततश्चावन्दिषातां तं हर्षोत्कर्षवशंवदौ । तेनाप्याभाषितौ धर्मलाभाशी:पूर्वकं तकौ ॥३३।। भोः ! युवां कुत आयातौ वदतं वदतांवरौ ! । गिरौ पिपतिषां ब्रूतस्तौ प्राग्वृत्तोक्तिपूर्वकम् ॥३४॥ ततो महर्षिणाऽभाणि न युक्तं युवयोरिदम् । ही ! कातरोचितं कर्म ज्ञातकर्मस्वरूपयोः ॥३५।। कुर्वाथां भोः ! युवां जैन धर्मं सुगतिहेतुकम् । दुःखौघबीजभूतोरुकर्मेन्धनदवानलम् ॥३६।। निःशङ्कं स्वीकृतं ताभ्यां तस्यर्षेस्तद्वचोऽञ्जसा । आतुरैरिव वैद्यस्य रोगाभिषजादिकम् ॥३७॥
Jain Education International 2010_02
For Private & Personal Use Only
www.jainelibrary.org
