Page Text
________________
खण्ड:-२ दृष्टान्तसमुच्चयः
१७३
एयं निसामिऊणं थक्को सो तम्मि चेव नयरम्मि । कोउगअक्खित्तमणो दिणे दियन्तो नयरसोहं ।।१३६।। कहमेत्थ निद्धणोहं विलसिस्सं चिंतिऊण नयरीए । ईसरगिहम्मि खत्तं खणिऊणं गहियगिहसारो ।।१३७ ।। जा निगच्छइ तत्तो पत्तो आरक्खिएहिं सहस त्ति । तो बंधिऊण नीओ करणे मंतिस्स पासम्मि ।।१३८ ।। चोरो त्ति काउमेसो भणियममञ्चेण देहचायस्स । ता निंति वज्झभूमीए किंकरा लद्धआएसा ।।१३९।। पुव्वुत्तमलियमेयं किं होही जाव चिंतए कुमरो । ता दुग्गसूलवेयणविवसो तन्नयरनरनाहो ।।१४०।। मरइ अपुत्तो तो मंतिपमुहसामंत-पउरलोएण । अहिवासिऊण सम्मं गयपभिई पंचदिव्वाइं ।।१४१।। मग्गिज्जइ नररयणं पुव्वभवुप्पन्नपुन्नपब्भारं । रज्जनिमित्तं नयरे तिय-चञ्चर-देउलाईसु ।।१४२।। तो जंताई ताई दिव्वाइं नयरबाहिरुद्देसे । पेच्छंति खरारूढं रत्तंदणलित्तसव्वंगं ।।१४३।। सिरिउवरिधरियछित्तिरमारोवियगलसरावमालं च । वज्जंतवज्झडिंडिममुग्घोसिज्जंतचोरवहं ।।१४४ ।। तं मूलदेवचोरं गलगज्जी ता गाएण पारद्धा । गुरुहरिसपरवसेणं हएण हेसारवो विहिओ ।।१४५ ।। कलसं घेत्तूण करी अहिसिंचिय नेइ खंधदेसम्मि । ढलियं चामरजुयलं उवरि ठियं सेयवरछत्तं ।।१४६।। उच्छलिओ तूररवो जयजयसद्दो पवढिओ झत्ति । उद्दामबंदिविंदेण परिगओ पउरलोएण ।।१४७।। रायसहाए पत्तो मुत्तामणिमंडिए चउक्कम्मि । सिंहासणे निविट्ठो पणओ सामंतमंतीहिं ।।१४८।। अह देवयाए गयणे भणिया सामंतमंतिणो सव्वे । जह एस पुनकलिओ विक्कमराओ महाराओ ।।१४९।। जो आणाए वट्टइ न सम्ममेयस्स तस्स न खमामि । तप्पभिइ अमञ्चाई संजाया आणतल्लिच्छा ।।१५० ।। जाओ महानरिंदो पडुपयडपयावपत्तमाहप्पो । निट्ठवियवइरिविंदो जहत्थमणुपालए रज्जं ।।१५१।। अह अन्नया कयाई राया चित्तम्मि चिंतए एवं । सह दंतिसहस्सेणं लद्धं रज्जं जहुद्दिटुं ।।१५२।।
किन्तु
किमणेण देवदत्तारहिएणं सुंदरेण रज्जेण ? । जेण पियसंपओगो रज्जं कज्जं किमनेण ? ।।१५३।। तो पट्ठविओ लेहो उज्जेणिनराहिवस्स नरवइणा । भणिओ य मज्झ नेहो एईए देवदत्ताए ।।१५४ ।। जइ पडिहासइ तीए तुम्हाणं सव्वहा अभिमयं च । मह जीयनिव्विसेसं ता पेससु तं सिणेहेण ।।१५५ ।। इय वाईऊण लेहं रन्ना लेहारिया इमं भणिया । भो भो ! किमेवमेयं बिन्नायडसामिणा लिहियं ? ।।१५६।।
कि अम्हाणं तस्स य कोइ विसेसो समत्थि रज्जम्मि ? ।
जेणाहं नियरज्जं सव्वमिणं तस्स कप्पेमि ।।१५७ ।। हक्कारिऊण भणिया गणिया रन्ना जहा तए भद्दे ! । विनत्तमासि पुव्वं जह मोत्तुं मूलदेवं मे ।।१५८ ।।
Jain Education International 2010_02
For Private & Personal Use Only
www.jainelibrary.org
| SR No. | 002562 |
| Book Title | Agam 25 Prakirnak 02 Atur Pratyakhyan Sutra |
| Original Sutra Author | Veerbhadra Gani |
| Author | Kirtiyashsuri |
| Publisher | Sanmarg Prakashan |
| Publication Year | 2010 |
| Total Pages | 400 |
| Language | Prakrit, Sanskrit, Gujarati |
| Classification | Book_Devnagari, Agam, Canon, F000, & F020 |
| File Size | 11 MB |