________________
10
जयन्तीप्रकरणवृत्तिः । गाथा २।३ निप्पन्ने पायारे सरणागयवज्जपंजरायारे। परपुरिसाए अलंघे महासईणं व हिययम्मि ॥२१५॥ इन्धणधणकणचोप्पडकप्पडमाईहिं पूरिए अंतो । तत्तो मिगावईए मणोहरे व्व अइगुरुए ॥२१६।। सह इंदियपसरेणं रोहं पोलीण तो दिढं काउं । चिट्ठइ एसा देवी चारित्तग्गहणसद्धाए ॥२१७|| निज्जिणियमोहजोहा मुक्कविरोहा विसप्पिगुणसोहा ।
ओहामियनरनाहा देवी चिंतइ इइ सलाहा ॥२१८॥ "धन्नो सो च्चिय देसो विहरइ सिरिवीरजिणवरो जत्थ । अवहरियदुरियतिमिरो मिहिरो इव सुहकरोल्लासो ॥२१९॥ कोसंबीए कयाई बोहितो भवियकमलसंडाई । आसुल्लाससमुज्जयपाएहिं पवित्तयं काही ॥२२०॥ दोसाविसारणेणं जस्सागमणेण होइ अच्छरियं । सव्वाण कोसियाणं सम्मदिट्ठीण आणंदो ॥२२१।। अरुणकरपल्लवम्मि य समोसढे जम्मि तावपडिवक्खे । सुमणोवियासरम्मो सच्चमसोउ वहइ लोए ॥२२२॥ जयचक्खुम्मि जिणिन्दे समागए दलियमोहनिद्दम्मि । गम्मागम्मविवेगो कामम्मि निसायरे नढे ॥२२३॥ दूरीहवन्ति सहसा कामग्गहविसमविसहरप्पसरा । भुवणपहायरजिणवरफुरियमहामंडले दिढे ॥२२४॥ किं बहणा? जिणनाहे समागमे मज्झ परिउम्माहे । पडिवज्जिस्सं दिक्खं सिक्खमवस्सं गहिस्सामि" ॥२२५।। चिन्तन्तीए तीए मिगावईए वियंभिओ पवणो । सुरही सीयलमउओ दिव्वो निव्वुइकरो झत्ति ।।२२६।। तेण य नच्चिरविहसिरमणमुहनयणुप्पलाए देवीए । पुलओ अंगे पउमिणिनालयकंटयसिरि पत्तो ॥२२७॥
15
20
25
Jain Education International 2010_02
For Private & Personal Use Only
www.jainelibrary.org
