________________
जयन्तीप्रकरणवृत्तिः । गाथा २३
गूढसिरजाणुहिट्ठा मसिणा सोहिति जंघिया जीए । रइरमणभवणतोरणकणयमयत्थंभियाउ व्व ॥४६॥ अन्नह नियंबभूमीभारो धारिज्जए कहं ? जीए । इय चिंतिऊण विहिणा विहिया कुमुन्नया चलणा ॥४७॥ पयकमलुज्जोयकरो अरुणो नहरयणपसरियकरोहो । चोज्जं तु इमं जं मोहइ लोयदिट्ठिओ ॥४८॥ अह तीए समं भोए तस्स नरिंदस्स भुजमाणस्स । गुणवं पुत्तो जाओ उदयनामेण विक्खाओ ॥४९॥ अह तत्थ तया एगो चिंतइ चित्तगरदारगो दक्खो । दट्ठाव्वाणं दंसणफलाइं नयणाई तो नूणं ॥५०॥ गंतव्वं चिय देसन्तरेसु धीरेण सत्तजुत्तेण । गव्वगहनिग्गहत्थं विन्नाणविसेसलाहत्थं ॥५१।। इय चिंतिऊण एसो नाणादेसन्तरेसु हिंडन्तो । पत्तो साकेयपुरं कमेण अलयाउरीरम्मं ॥५२।। तत्थ त्थि एगपत्ता थेरी तीए घरम्मि चिद्वेइ । पेक्खंतो सिक्खंतो कोउयविन्नाणलक्खाई ॥५३॥ पुव्वोत्तरदिसिभाए तत्थ य एगो सुरप्पिओ जक्खो । संनिहियपाडिहेरो त्ति निग्गहाणुग्गहक्खणिओ ॥५४|| पइवरिसं चित्तेउं कीरइ गरुओ महूसवो तस्स । सो चित्तयरं मारेइ, अचित्तिओ देसमवि रुट्ठो ॥५५॥ रन्ना पुण चित्तयरा पंचत्तव्वाहिएण नस्संता । अवरुद्धा पडिबद्धाभिहाणया गोलजुत्ति(त्ती)ए ॥५६॥ जस्स य नामं दीसइ, गोलम्मि विहाडियम्मि वरिसन्ते । सो चित्तयरो चित्तेइ, एवं कालम्मि वच्चन्ते ॥५७॥ तम्मि य वरिसे थेरी, सुयवारयआगमेण दुक्खत्ता । अनलेण व दझंती अइकरुणं रुयइ विलवन्ती ॥५८॥
Jain Education International 2010_02
For Private & Personal Use Only
www.jainelibrary.org
