________________
३०६
जयन्तीप्रकरणवृत्तिः । गाथा ४।५।६ चिन्तइ एत्थ भविस्सइ हिरन्नमणिरयणकणयभण्डारो । सुपयत्तपिहियदारो दीसइ जं एस उयरओ ॥७६॥ लोहन्धो सो मज्झे पेहइ उप्पिहियदारए तम्मि । मंजूसं सविसेसं जत्तेणेगन्तसंठवियं ।।७७॥ हरिसभरभरियहियओ तीओ उम्मुद्दियाए मज्जम्मि । सुसिलिट्ठकट्ठकम्मं समुग्गयं पेच्छए तयणु ॥७८।। उग्घाडियम्मि तम्मि वि पुडयमज्झम्मि सुरहिवासाण । घाणिन्दियसुहयाणं मुदं अवणेइ गहिऊण ||७९।। गिण्हन्तो तग्गगन्धं साणन्दं तस्स मज्झयारम्मि । पेच्छइ सुबन्धुमन्ती पयर्ड लिहियक्खरभुज्जं ॥८०॥ संभन्तो करकमले भुजं ठविऊण वाइऊणेसो । भावेइ अक्खराई इमाई जो जिंघिउं वासो ॥८१॥ भोगुवभोगवयारं अजियक्खो न्हाणभोयणाइयं । सेज्जासणविलयाहि काही कीणासअतिही सो ॥८२॥ एयाए गाहाए नवरि माणसम्मि पुरियाए । उक्कलियाओ धणियं सुबन्धुमन्तिस्स जायन्ति ॥८३॥ जइ सच्चं चिय एवं तोऽहं चाणक्कमन्तिणा निहओ । जीवन्त च्चिय दुहदवजालावलिलीढसव्वंगो ।।८४|| तो अग्घाइयवासे पुरिसे अन्नम्मि कम्मि वि करेमि । हिययट्ठियपरमत्थो भोगोवभोगेहिं सुपरिक्खं ॥८५॥ इय चिन्तिऊण अन्नं पुरिसं अग्घाविऊण ते वासे । भोगेहिं मयं दटुं सो चिट्ठइ दव्वसाहु व्व ॥८६॥ अवणियकेसकलावो दूरुज्झियतरुणिसंगमालावो । सिंगारसरसभोयणदिव्वासणसेज्जपरिहीणो ॥८७॥ दीणो मणमलीणंगो अट्टज्झाणेण पइदिणं एसो । पेसुन्नपावबीयप्परूढदुक्खंकुरुक्केरो ॥८८॥
25
Jain Education International 2010_02
For Private & Personal Use Only
www.jainelibrary.org
