________________
३०५
जयन्तीप्रकरणवृत्तिः । गाथा ४।५।६
कम्ममलविप्पमुक्काणं सिद्धाणं तह य सरणमावन्नो । तेसिं चेव समक्खं चएमि पावसमारम्भं ॥६३॥ आयारियाइयाणं मुणीण तवचरणकरणनिरयाणं । गच्छामि अहं सरणं काऊणं पाववोसिरणं ॥६४।। धम्मो जिणिन्दभणिओ छज्जीवनिकायवच्छलो सरणं । पडिवन्नोऽहं सम्मं तिविहं तिविहेण जाजीवं ॥६५॥ एयम्मि अणाइए भवम्मि विविहाइपावट्ठाणाई । मूढेहिं विहियाई सव्वाइं ताई गरिहामि ॥६६॥ जिणधम्मम्मि प्पवन्ने कयाइ कीरन्ति जाणि सुकडाणि । ताई अणुमोएमो समयविहीए पवत्ताई" ॥६७|| इच्चाइ भावणाए दिव्वोसहिपियसहीए लीलाए । उद्धरियसव्वसल्लो चाणक्को मोहपडिमल्लो ॥६८॥ एवं धम्मज्झाणे सारयपसरन्तचन्दकिरणोहे । तस्स मणो पइसमयं सरं व परिनिम्मलं होइ ॥६९।। कम्मवणहव्ववाहो पसरइ देहम्मि तस्स जह दाहो । तह वट्टइ सयंसाहो सिववहुसुहसंगमोम्माहो ॥७०॥ तेलोकमत्थयत्था सिद्धा अइरामरा महासत्ता । केवलनाणमणंतं पत्ता असरीरिणो धन्ना ॥७१॥ गब्भाइयं दुक्खं जीवाणं होइ किल समग्गं पि । कम्ममलमइलियाणं सरीरसंगेण सव्वं पि ॥७२॥ ता मज्झ वि कणयस्स व तवेण विविहेण कम्ममलडहणे । कल्लाणप्पा कइया अप्पा सव्वप्पणा भावी ॥७३॥ एवं विसुद्धभावो चाणक्को मन्तिसत्तमो सड्ढो । आराहिउत्तमट्ठो दियलोए सुरवरो जाओ ॥७४।। सो वि य सुबन्धुमन्ती पयम्मि सयवत्तपत्तपरभागे । सिरिघरए उवलद्धे कमेण चाणक्कपासाए ॥७५॥
25
Jain Education International 2010_02
For Private & Personal Use Only
www.jainelibrary.org
