________________
२९५
जयन्तीप्रकरणवृत्तिः । गाथा ४।५।६
छज्जीववच्छलाणं तवचरणं तुम्ह दिट्ठमाहप्पं । कप्पद्रुमु व्व फलयं अम्हाणं होउ आकप्पं ॥१०७॥ तुम्हं मुणीसराणं पयभत्ती होइ पुन्नवन्ताण । किं चिन्तामणिलाहो सव्वाण वि होइ जीवाणं ?" ॥१०८।। एवं थुणिऊण सो चक्की सब्भूयगुणगणे हिट्ठो । कयमुणिपायपणामो जहागयं पडिगओ झत्ति ॥१०९।। चक्किस्स इत्थिरयणे नमिरे पयकमलअलयफासेण । विसयामिसम्मि गिद्वी संभूयमणम्मि संभूया ॥११०॥ तीए वि वेयदिट्ठी हट्ठा नियाणं करेइ सो तयणु । इमिणा तवेण इत्थीरयणं मह होज्ज अन्नभवे ॥१११।। चित्तमुणिन्देण तओ चिट्ठादिट्ठीहि तस्स विन्नायं । इत्थिरयणोवलंभे करइ नियाणं तवेणेसो ॥११२॥ "संविग्गमणेणेवं भणिओ मा वच्छ ! तुच्छविसयाण । लोहेण हणसु दुलहं महप्पभावं तवच्चरणं ॥११३।। भवजलहितरणजाणं चरणं कल्लाणसुरगिरिसमाणं । जं पुण कुणसि नियाणं तं ठाणं सव्वदुक्खाणं ॥११४।। अपमत्तेण चरित्तं चिरकालं पालियं तए धीर ! । तमणेण नियाणेणं सल्लिज्जइ दुट्ठसल्लेणं ॥११५।। मरणं च ससल्लाणं अणंतदुक्खाण कारणं वोत्तं । उद्धरसु धीर ! तम्हा नियाणसल्लं तवसरीरे ॥११६।। सुसिलिट्ठकठ्ठनिम्मियअइदिढचारित्तजाणवत्तेण । भवसायरम्मि तिन्नप्पाए तम्मि किं बुड्डिसि इयाणि ? ॥११७॥ अच्चंतिय-एगन्तियसिद्धिसुहाणं निबन्धणं चरणं । मणुयविसयाण कज्जे हारिसि किं ? वच्छ ! तुच्छाण ॥११८॥ नन्दणवणं व एयं तवचरणं पालियं चिरं सहलं । किं दहसि ? नियाणेणं हुयासणेणेव तं सोम ! ॥११९॥
15
20
25
Jain Education International 2010_02
For Private & Personal Use Only
www.jainelibrary.org
