________________
२९१
जयन्तीप्रकरणवृत्तिः । गाथा ४।५।६
पसरंति चच्चरिओ विचित्तसिंगारतरुणतरुणीणं । बहुभंगरंगगेयज्झुणिवीणावेणुमहुराओ ॥५५।। ते वि य हाहाहूहूमहूरसरा रइयदिव्वसिगारा खेलति । चच्चरीए नयरीए चच्चरपहेसु ॥५६॥ ताणं गीयसरेणं महुरेणं मुच्छिओ जणो गिद्धो । सयलो तत्थागच्छि छिप्पाछिप्पं अविगणन्तो ॥५७॥ राया पुरोहिएणं विन्नत्तो देव तुम्ह नयरीए । मायंगचच्चरीए एक्काकारीकओ लोओ ॥५८॥ तो राया पडिसेहइ मायंगेहिं न मज्झ नयरीए । मज्झम्मि पविसिऊणं कायव्वा चच्चरी कहवि ॥५९।। नयरीए बाहिं चिय गीयाइकलाहिं तयणु खेलंति । सव्वेसु ऊसवेसुं परिभूया चित्त-संभूया ॥६०॥ पत्तम्मि सरयमासे अमियरसुल्लासिससिकरपयासे । गीयाइकलब्भासे इन्दमहे पयडियविलासे ॥६१॥ एयाए नयरीए एयम्मि महूसवम्मि सग्गसिरी । होहि त्ति पेच्छणत्थं ते दो पच्छन्नरूवधरा ॥६२॥ पविसित्तु पुरीमज्झे रयणीए ठंति रंगभूमीए । पेच्छंति गीयवाइयनाडयकोउहलसयाइं ॥६३॥ अह तेसिं रसपसरो हवेइ जेणऽप्पयं अजाणंता । सयणाण सुहासारंगीउग्गारं पयासंति ॥६४॥ तो आउदो लोओ सव्वो वि तइक्कचित्तयं पत्तो । चित्तलिहिओ व्व चिट्ठइ चिंतइ किं किन्नरा एए? ॥६५॥ अहवा नरा वि एए सिक्खविया तुंबरेण गीयकलं । हरिएसकुलब्भूया, किंवेए चित्त-संभूया? ॥६६॥ धिद्धी एए रन्नो आणं उलंघिऊण नयरीए । मज्झम्मि जं पविट्ठा दुट्ठा धिट्ठा हणह तम्हा ॥६७।।
25
Jain Education International 2010_02
For Private & Personal Use Only
www.jainelibrary.org
