________________
२६६
10
जयन्तीप्रकरणवृत्तिः । गाथा ४।५।६ वड्डन्तो सो कीलइ समयबालाण मज्झयारम्मि । बालत्तसुलहचावलधूलीकीलाहिं विविहाहिं ॥४०॥ सो वि मुणी धम्मरुई गुरुयरवेरग्गमग्गमोइन्नो । आलोईय पडिक्कन्तो परमं संवेगमावन्नो ॥४१॥ वाणारसीनयरीए कम्माणं चित्तपरिणइवसेण । अप्पडिबद्धविहारो आगच्छइ बाहिरुज्जाणे ॥४२॥ अह नयरीए मज्झे भिक्खट्टा तेण कीलमाणेण । पविसन्तो धम्मरुई दिट्ठो बडुएण बालेण ॥४३।। रोसेण धमधन्तो दुवयणलिट्ठवलधूलिखिवणेण । तज्जइ मुणिं महप्पं बालयविन्देण परियरिओ ॥४४॥ उवसमसुहाभिसित्तो तत्तो एसो मुणी विचिन्तेइ । अज्झ अलं भिक्खाए दुकम्महेउ त्ति बालाण ॥४५।। पच्चाहुत्तं वलियम्मि तम्मि वलिएण पुव्ववइरेण । सो बडुओ अइकडुओ थक्केसु वि सेसबालेसु ॥४६॥ अणुगच्छइ तज्जन्तो वारिज्जन्तो वि सिट्ठलोएण । धम्मरुई वि चिन्तइ एसो किं नन्दजीवो त्ति ? ॥४७॥ तच्चमढणं सरन्तो मन्नुभरोल्लसियतेउलेसाए । सज्जो कहावसेसं बडुयं साहू कुणइ सहसा ॥४८।। मुणिमुक्कतेउलेसादाहे दुक्कम्मलेसनिज्जरणे । सुहभावपरिणईए तत्थुप्पन्नो निवो एस ॥४९।। ते सुकयत्था निम्मलगुणसच्छा कम्मनिहणणसमत्था । तइलोयमत्थयत्था सिद्धा चिट्ठन्ति ते सच्छा ॥५०॥ धन्ना ते सप्पुरिसा जे नवरमणुत्तरं गया मुक्खं । जम्हा ते जीवाणं न कारणं कम्मबंधस्स ॥५१॥ इय चिन्तन्तो विहरइ मुणी वि अन्नत्थ सुद्धतवचरणो । दुक्कडगरिहानिन्दणनिक्कन्दियपावपंकभरो ॥५२॥
15
20
25
Jain Education International 2010_02
For Private & Personal Use Only
www.jainelibrary.org
