________________
२३३
10
जयन्तीप्रकरणवृत्तिः । गाथा ४।५।६
अह सुकयपगरिसेणं ताणं सूरी समागओ बाहिं । उज्जाणे मणरमणे सेविज्जन्तम्मि सउणेहिं ॥३४॥ सह बन्धवेहिं गच्छइ धणसिरी तह य भाउजायाहि । गुरुपायवन्दणत्थं सम्पन्नमणोरहा तयणु ॥३५॥ अह वन्दिऊण गुरुपयकमलं विन्नवइ धणसिरी एवं । मह बन्धवाण भयवं जिणधम्मं कहह एयाण ॥३६॥ तत्तो गुरुहिं कहिओ करुणारसायरेहिं जिणधम्मो । वयणलहरीहिं तेहिं वि लद्धं सम्मत्तवररयणं ॥३७॥ तेणुज्जोइयसिवपुरमग्गे जिणरायपूयणाईए । अक्खलियपयचारेणं निच्चं चिय ते पयट्टन्ति ॥३८॥ भवजलहितरणपोयं जिणभवणं धणसिरीए कारवियं । दव्वव्वएण बहुणा तत्थ पयट्टन्ति पूयाओ ॥३९॥ तह तीए अवरावरतवदिणपूयावहाणदाणाई। दट्ठण जणो हिट्ठो कुणइ पसंसं जहा एसा ॥४०॥ धन्ना कयकल्लाणा दिणयरमुत्ति व्व पसरियपयावा । जिणवयणं कमलवणं सवियासं कुणइ भमरहियं ॥४१।। सोऊण धणसिरीए जणप्पसंसं अईवईसाए । गहियाओ जणपुरओ भाउज्जायाओ जम्पन्ति ॥४२॥ अम्ह पईणं अत्थो विच्चिज्जइ धणसिरीए धम्मम्मि । तो किं थ पसंसिज्जइ ? सुकरं चिय परधणं दाउं ॥४३॥ भाउज्जायावयणं लोयमुहाओ सुणित्तु सा निउणं । चिन्तइ मणम्मि भाउज्जायाउ एरिसी हुन्ति ॥४४॥ किंतु परिक्खा किरउ बन्धवचित्तस्स जइ न पडिहाइ । ता किं दव्ववएणं ? अम्हाणं धम्मकज्जम्मि ॥४५॥ तो पउमसिरीहुत्तं संज्झाए भणइ धणसिरी एवं । गंगा व्व जिणाभिहिओ दयावहो सव्वहा धम्मो ॥४६॥
15
20
25
Jain Education International 2010_02
For Private & Personal Use Only
www.jainelibrary.org
