________________
२२८
जयन्तीप्रकरणवृत्तिः । गाथा ४।५।६ अह पच्छिमम्मि काले पच्छायावेण भवउव्विग्गा । सम्मं गुरूण अंते उवट्ठियाऽऽलोयणं दाउं ॥१७।। अवितहमहालोयत्ता थूलेयरजीवखामणुज्जुत्ता । सा उत्तमट्ठकप्पं विहिणा पडिवज्जए तयणु ॥१८॥ पञ्चिन्दियदमदन्ता कोहाइकसायनिग्गहपसत्ता । आलोइयपडिक्कन्ता धम्मज्झाणम्मि संकन्ता ॥१९॥ धन्नाऽसि तुमं वच्छे सिवमग्गपसाहणम्मि अइदच्छे । माणससरं व सच्छे लद्धपसंसा समणगच्छे ॥२०॥ दुपरिच्चायमाहारं दसविहपाणाण सुदिढमाहारं । जं चयसि भावसारं करेसि तं जयचमुक्कारं ॥२१॥ एसोत्तमट्ठकप्पो पासाओ तुह चरित्तरायस्स। सन्तोससुहासुदिढो पइक्खणं होउ सुहवासो ॥२२॥ इच्चाइ सुगुरुवाणीसारयससिबिम्बकिरणकुरुलीहिं । कुमुयाकरो व्व वि य सइ अज्झवसाओ सुहो तीए ॥२३॥ एगम्मि दिणे मणसा सा चिन्तइ जइ करेइ महपूयं । सव्विड्डीए लोओ तो इह अइगउरवं होइ ॥२४॥ एइ तओ पुरलोओ पूयत्थं धूवपुप्फफलहत्थो । संसुमरियविज्जाए आहओ पंडुरज्जाए ॥२५॥ तत्तो उवउत्तेहिं गुरूहिं सम्भन्तचित्तवित्तीहिं । अज्जाविज्जासुमरणमाहप्पेणं ति विन्नायं ॥२६।। कलुसीकरेसि वच्छे ! गंगुज्जलमुत्तमट्ठकप्पमिमं । अज्जे ! पउत्तविज्जे ! जणपूयारम्भपंकेण ॥२७॥ एवं हि गुरूहिं भणिया संविग्गा सा पुणो पडिक्कन्ता । निन्दागरिहालोयणविसुद्धबुद्धीए संकन्ता ॥२८॥ पूयाहेडं पुणरवि पउत्तविज्जा गुरूहि सिक्खविया । विणियत्ता कइवयदिणपञ्जन्तपउत्तविज्जा सा ॥२९।।
25
Jain Education International 2010_02
For Private & Personal Use Only
www.jainelibrary.org
