________________
१७१
जयन्तीप्रकरणवृत्तिः । गाथा २।३
चउरासीइलक्खेसु जीवजोणीण वणनिकुंजेसु । भमिराणं सिवपुरवरपहो अहो होइ अइदुलहो ॥२८॥ इट्ठाणिट्ठविओगप्पओगदावुच्छलन्तजालाहिं । . डज्झन्ताणं ताणं घणोदओ होइ जिणधम्मो ॥२९॥ न वि अत्थि भवारन्ने जियाण पडिबन्धकारणं किंपि । जेणिन्दचावचवलं सयलं धणभवणसयणाई ॥३०॥ उत्तुंगसिंगगिरिवरपसरियसरियातरंगतरलाइं । जं जीवाण उब्बणजोव्वणलावन्नप्पेमाइं ॥३१॥ परिणामदारुणेसुं दुग्गइदुहकारणेसु विसएसु । सम्मदिट्ठिविणासणरसियं गिद्धि निवारेह ॥३२॥ संसारम्मि अरन्ने किम्पागफलोवमेसु विसएसु । सन्नाणजीवियत्थी को नाम करेइ अहिलासं ? ॥३३॥ रागद्दोसकसाया एत्थ पिसाया सया वि वियरन्ति । तेहिं गसिज्जन्ताणं, कहं ? सुहं होइ जीवाणं ॥३४॥ तम्हा सम्मइंसणचरित्तरूवेण सुट्ट मग्गेण ।। लंघिज्ज भवारन्नं खिप्पं पावेह सिद्धिपुरिं" ॥३५॥ इय जिणवरधम्मकहा पहा जहा दिणयरस्स पसरन्ती । अन्नाणमन्धयारं निहणइ भव्वाण जीवाण ॥३६॥ चक्की वि वइरनाहो तत्कालोप्पन्नसिवसुहुम्माहो । चिन्तइ इह गिहवासे न तत्तउ को वि मह लाहो ॥३७॥ सो विन्नवइ जिणिन्दं साणन्दं नाथ ! तुम्ह पयकमले । होमि महव्वयधारी अलि व्व लीणो रयं धणियं ॥३८॥ भयवं वि भणइ नरवर ! अहासहं मा करेस पडिबन्धं । जं उत्तमाण उत्तमकज्जे निच्चोज्जम्मो होइ ॥३९॥ तो राया नमिऊण संविग्गो जिणवरस्स पयकमलं । आगच्छइ नयरीए रज्जं सोत्थं करेइ सिग्धं ॥४०॥
Jain Education International 2010_02
For Private & Personal Use Only
www.jainelibrary.org
