________________
१५०
तहाहि
जयन्तीप्रकरणवृत्तिः । गाथा २३ पच्छित्तं सुपवित्तं आलोयणमाइदसविहं वुत्तं । पावगिरिदलणदक्खं सच्चं रंजइ सहस्सक्खं ॥१५॥ इन्दियकसायअव्वयदुकयं सल्लइ मणम्मि जीवस्स । तं जइ सुगुरुसयासे जीवो आलोयए सम्मं ॥१६॥ सो सल्लमुद्धरंतो अज्जववज्जेण कूडसंघडियं । दलिऊण पावमयलं सिवमग्गे जाइ अक्खलिओ ॥१७॥ सिवनयरम्मि पविट्ठो अणन्तरवरनाणदंसणगरिह्यो । सुहसायरमज्झत्थो अणन्तकालं रहइ सच्छो ॥१८॥ इहलोए वि य सरलो सलं तं जो कहेइ नियकाए । सो होइ फलिहमल्लो जहा तहा भोगआभागी ॥१९॥ लज्जावलेवलत्तो धिट्टो पुट्ठो वि णेगभंगेहिं ।। अंगे दुहं निगृहइ मच्छियमल्लो व सो मरइ ॥२०॥ अत्थि इह जंबुद्दीवे दक्खिणभरहेत्थ मज्झम्मि खण्डे । रम्मो कुंकुणदेसो जत्थ सिरीणं सयावासो ॥२१॥ आरामुज्जाणेसुं जो सइ विलसन्तनागपूगेहिं । अइसायसेसालो रेहइ पायालसग्गो व्व ॥२२॥ परिमलमिलन्तअलिउलझंकारच्छलेण इन्तलच्छीण । कमलागरेसु जत्थ य मणिमयनेउररवोग्गारो ॥२३॥ जत्थ य चम्पयतरुणो परिमललुद्धालिजालबुसमग्गा । परिणयफलभरजंबूकाणणलच्छि विडंबन्ति ॥२४॥ रामा जत्तारामा रमणीया तिलयपत्तवल्लीहिं । पुप्फफलभोगसुहया सज्जज्जणनयणकमणीया ।।२५।। तत्थत्थि वरं नयरं कंकणसिरितारहारसोहग्गं । सोपारयं पुरंदरपुरं व सरंभाविलासिल्लं ॥२६॥ सिरिरिसहसामिमंदिरकंचणकलसोल्लसंतकिरणेहिं । जं कल्लाणमयं चिय दुहा वि विबुहा पसंसन्ति ।।२७।। जं अंतो बाहिं पि य सालेहिं समुन्नएहिं सोहेइ । घणदलसच्छाएहिं सुयन्धकुसुमोवसोहेहिं ॥२८॥
25
Jain Education International 2010_02
For Private & Personal Use Only
www.jainelibrary.org
