________________
१४५
जयन्तीप्रकरणवृत्तिः ।गाथा २।३
गोयरचरियाइगयं तत्थ य दट्टण पंडियाधाई । भिक्खट्ठा हक्कारइ गणियागेहम्मि दंभेण ॥२४९।। अणुकूलं तो पसरइ सच्छेहिं पएहिं अह अतुच्छेहि । सा देवदत्तगणिया लावन्नतरंगिणी बहुहा ॥२५०॥ किंतु मुणिंदे पव्वयवरम्मि पविकढिणधम्महिययम्मि । अवगयरयसंभारे न हवइ भेओ मणागं पि ॥२५१॥ उवसग्गन्ती गणिया तेणं तिणपूलय व्व सा गणिया । तं चुज्जं जं तीए न तत्थ मयणानलो ज्जलिओ ॥२५२॥ सायं तीए मुक्को उज्जाणं जाइ सो महासत्तो । तत्थ वि अभया पिच्छइ तं वन्तरदेवयाहूया ॥२५३॥ सा तं तत्थ कयत्थइ सुमरन्ती पुव्वजम्मवुत्तन्तं । जेणाणुगामिवेरं रिणं व जीवाण संसारे ॥२५४॥ उवसग्गपबन्धेहि निरंतरं तयणु कीरमाणेहिं । अभयाए देवीए कुद्धाए अइविरुद्धाए ॥२५५॥ न य तस्स मणोवित्ती उवसमरससारिणी पसप्पंती । धम्मज्झाणारामे थक्कइ बहु मूलगुणहेऊ ॥२५६।। तत्तो अपुव्वकरणे आरूढो खवगसेढिनिस्सेणिं । गिण्हइ कुसुममुज्जलमक्खयमहक्खायचारित्तं ॥२५७।। अह अभयाए दोसं अन्नाणमहंधयारहरणेण । अवणिन्तो निहणंतो अन्नज्जोईण उज्जोयं ॥२५८॥ केवलनाणदिणिदो सुक्कझाणोदयम्मि अयलम्मि । लोयालोयउज्जोयं करेइ उइओ मुणिन्दस्स ॥२५९॥ तयणु सुदंसणमुणिवरगुणेहि आयड्डिया महिड्डिया ।
देवा कुणंति केवलमाणमहं भत्तिसत्तीहि ॥२६०॥ तथाहिहु "गंधोदयसित्ताए धरणीए पंचवन्नकुसुमाणं ।
वुढेि मुयंति सरहससीहनिनाएण वयन्ति ॥२६१।।
Jain Education International 2010_02
For Private & Personal Use Only
www.jainelibrary.org
