________________
जयन्तीप्रकरणवृत्तिः । गाथा २॥३
राया वि तस्स वियरइ सभूसणं पारिओसियं दाणं । कारिय पुरवरसोहं वीरजिणं वंदिउं चलिओ ॥८१०॥ ओलोयणट्ठिएणं मेहकुमारेण नयरलोओ वि । एगदिसाए जंतो हिट्ठो तुट्ठो समिड्डीए ॥८११।। तो परियणपुच्छाए भत्तिविन्नायजिणागमो इमो । भत्तिब्भरनिब्भरंगो गच्छइ जिणरायनमणत्थं ॥८१२॥ अह, विहिवंदियवीरो सदेवमणुयासुराए परिसाए । मेहकुमारो हिट्ठो उवविठ्ठो उचियट्ठाणम्मि ॥८१३॥ तो धम्मदेसणाए दिणमणिकिरणावलीपियसहीए । अवसरइ मोहतमभरपसरो जीवाण भव्वाण ॥८१४।। धम्मकहाए दिव्वोसहीए भिन्नम्मि मोहगंठिम्मि । जीवाण नाणलच्छी करेइ हियएण परिरंभं ॥८१५॥ जिणचंदाओ धम्मोवएसखीरन्नवो समुल्लसिओ । संवेगरसुल्लासं मोत्तियफलयं करेइ चेव ॥८१६।। परलोयसाहणुज्जयवीरजिणिदेण धम्मगुणकहणे । मोहमहामहिवइणो दलम्मि पवियंभिओ खोहो ।।८१७।। वीरजिणधम्मकहणे गज्जियगंभीरधीरवाणीए । सच्चं मेहकुमारो पमोयवाहंबुधाराहिं ।।८१८॥ सिंचंतो खेत्ततलं पुलयकयंबाण जणियउल्लासो । वीरजिणपायपायवसंथवमेवं करइ नमिरो ॥८१९।। तुह पयजुयले लद्दे कप्पडुमविब्भमे मए देव ! । भवदारिदं दूरे वोलीणं दिन्नदुहलक्खं ॥८२०॥ "तुह तइलुक्कदिवायर दोसोदयदलणपायसंसग्गे । किं चुज्जं ? जं बोहो राजीवाणं व जीवाणं ।।८२१।। मुणिमंडलगुरुतारयपयासकरतावहरणललियंगो।। लोगुत्तरस्सरूवो तुमं सि जिणनाह जयचक्खू ॥८२२॥
Jain Education International 2010_02
For Private & Personal Use Only
www.jainelibrary.org
