________________
६३
जयन्तीप्रकरणवृत्तिः । गाथा २।३
जीवदयाकप्पलयापुन्नंकुरविब्भमेण गब्भेण । कमहुंतघणदलेणं सच्छाया धारिणी जाया ॥७४०।। मासि तइयम्मि तीए गंभीरे माणसम्मि हंसो व्व । घणरससपक्खवाओ चुज्जमिणं डोहलो जाओ ।।७४१॥ इच्छइ पाउसलच्छि अकालमेहेहिं पंचवन्नेहिं । गंभीरधीरगज्जियनच्चाविज्जंतमोरेहिं ।।७४२।। दीसंति इंदगोवा इओ तओ वुट्ठिउट्ठिया जत्थ । पाउससिरीए चरणालत्तयपडिबिंबसारिच्छा ।।७४३।। विहडंतकेअईपुडपरिमललुद्धालिमालिया जत्थ । अवलोइज्जइ एसा वेणी किर काणणसिरीए ॥७४४॥ निज्झाइज्जइ जूहीजालयकुडयाण कुसुमसंभारो । नं पाउसलच्छीए आगमणलाजंजली जत्थ ॥७४५।। बप्पीहमोरपडिरवमिसेण घोसंति जत्थ जलयाण । जलसेयविगयतावा पव्वयकडयाऽऽसु आगमणं ॥७४६।। सोहइ पुहवी जत्थ य सुयपेच्छच्छायबहलहरिएहि । पाउससिरीए खेल्लणमरगयमयपेढिया रम्मा ।।७४७।। खीरोयधवलपल्ललतरंगसंसग्गसीयलो जत्थ । धाराकयंबपरिमलबहलो पवणो मिऊ सुहओ ॥७४८।। मेहे अमोहधारे जत्थ य पसरंततडिचमक्कारे । कस्स न हरेइ हिययं तारो निज्झरणझंकारो ॥७४९।। रसपूरपूरियाओ सरियाओ जत्थ कलुसचरियाओ। उम्मग्गपसरियाओ अहिसारियदोसभरियाओ ।।७५०॥ एवंविहम्मि पाउसकाले धन्नाओ ताओ रमणीओ । जाओ कीलंति चिरं दहनिज्झरसरवणगिरीसु ।।७५१॥ जयकंजरमारूढा अहं पि जइ नरवरेण सकरेण । धरियधवलायवत्ता वियरंती दाणमइरित्तं ॥७५२॥
१. नं = इव । हे. ८।४।४४४।।
Jain Education International 2010_02
For Private & Personal Use Only
www.jainelibrary.org
