________________
२४
श्रीधर्मविधिप्रकरणम्
चउविहआउज्झकला, चउरा संगीयसज्जगंधव्वा । सेवंति य इच्चाई, निसुए परिहारवयणम्मि" ॥२२५।। अह सो दिन्नुवओगो, अवहिन्नाणेण पुव्वभवचरियं । एवं सुमरइ सो हं, सेयवियाए पएसिनिवो ॥२२६॥ जं केसिपसाएणं, धम्मो सुपरिक्खिओ मए विहिओ । पत्तं तप्फलमेयं, जयइ अहो धम्ममाहप्पं ॥२२७॥ इय सुमरिऊण उट्ठइ, अह पडिहारेण दिन्नवाहू सो । सिंहासणे निसन्नो, जयजयकारम्मि उच्छलिए ॥२२८॥ तत्तो अभिसिंचिज्जइ, सुरेहिँ वीइज्जए य चमरेहिँ । गंधव्वेहि कलगीयाहिं, गाइज्जए तत्थ ॥२२९॥ तत्तो य समुद्रुउं, स सूरियाभो अनन्नभत्तीए । गंतूण जिणाययणं, सासयपडिमाउ पूएई ॥२३०॥ वरनाणदीवसरिसाइँ, सो तओ पुत्थयाइँ वाएइ । पूयइ माणवथंभ-ट्ठियाणि अरहंतअट्ठीणि ॥२३१॥ इच्चाइ देवकिच्चाइँ, तत्थ काऊण सूरियाभसुरो । निययसहाए पत्तो, जंबुद्दीवं पलोएइ ॥२३२॥ इत्तो य तत्थ दिट्ठो, अवहिन्नाणेण वद्धमाणजिणो । विहरंतो संपत्तो, आमलकप्पाइ नयरीए ॥२३३।। तो तव्वंदणहेडं, कारावइ आभिओगियसुरेहिं । तत्थ जिणसमवसरणं, काऊणं ते वि साहति ॥२३४॥ अह सो सव्विड्डीए, दिव्वविमाणम्मि आरुहेऊण । सामाणियाइपरियर-संजुत्तो एइ तं नयरिं ॥२३५॥ तत्थ य सो ईसाणे, दिसिभाए अंबसालवणमज्झे । उत्तरिय विमाणाओ, संपत्तो समवसरणम्मि ॥२३६।। तिपयाहिणी करेउं, विहिपुव्वं वंदए जिण वीरं । काऊण संसयाणं, वुच्छेयं विन्नवइ एवं ॥२३७।।
Jain Education International 2010_02
For Private & Personal Use Only
www.jainelibrary.org
