________________
प्रथमं धर्मपरीक्षाद्वारम्
नवरं सो नरनाहो, सोमसहावो वि बहुविगहुणेहिं । कुमयपयासणदोसा-संगमयं धरइ अणवरयं ॥५॥ सूरियकंता कंता, सूरियकंति व्व तस्स गयदोसा । उल्लासियकमला वि हु , जणेइ जा कुवलयाणंदं ॥६॥ सूरियकंतो पुत्तो, सूरियकंतु व्व तेसि सच्छाओ । जो सूरकरबलेणं, परं तवंतो वि सोमगुणो ॥७॥ सव्वत्थ पत्तरेहो, वन्नाधारो सुरूवगुणकलिओ। तस्सासि महामंती, चित्तो चित्त व्व चित्तहरो ॥८॥ अह अन्नया स रन्ना, सावत्थिपुरीइ रज्जकज्जेण । जियसत्तुनिवसमीवे, पट्ठविओ पडिसरीरं व ॥९॥ तत्थागओ स मंती, निवदिन्नावासउवरिभूमिट्ठिओ । पिच्छइ निग्गच्छंतं, नयरजणं बाहिरुज्जाणे ॥१०॥ तो पभणइ नियपुरिसं, कत्थ जणो जाइ एस इय मुणसु । अह सो वि तं सरूवं, नाऊणं मंतिणो कहइ ॥११॥ देव ! इह अत्थि पत्तो, उज्जाणे पासनाहसंताणी । केसीनामगणहरो, संपुन्नदुवालसंगधरो ॥१२॥ जो चउनाणपहाए , हरइ तमो दिणयरु व्व लोयाणं । तस्सेस वंदणत्थं, जाइ जणो भत्तिभरियंगो ॥१३॥ तत्तो चित्तो पत्तो, सपरियणो तत्थ केसिगुरुपासे । सेलु व्व थद्धदेहो, जा चिट्ठइ तं पलोयंतो ॥१४॥ अह तस्स गुरू बोहं, णाणेण वियाणिऊण तं चित्ते । चित्तं तो भणइ इम, भो चित्तअमच्च ! आगच्छ ॥१५॥ सुणसु तुमं नियपहुणा, पट्ठविओ इत्थ अमुगकज्जेणं । तस्सेवं अज्ज कओ, रयणीए निन्नओ रन्ना ॥१६॥ तं सोउं सो सचिवो, चिंतइ हिययम्मि विम्हिओ एवं । निसुअं पि मज्झ नामं, मुणइ इमो इत्थ न हु चुज्जं ॥१७।।
15
20
25
Jain Education International 2010_02
For Private & Personal Use Only
www.jainelibrary.org
