________________
२६४
श्रीधर्मविधिप्रकरणम् पभणइ वक्कलचीरी, पाहुन्ने भो महेसिणो तुम्हे । महुराइ सुपक्काई, एयाइँ फलाइँ भुंजेह ॥१०९॥ तओ भणंति अम्हाण, आसमे भद्द ! एरिसफलाई । अइनीरसाणि नीरसं, न भुंजई को वि कइया वि ॥११०॥ पिक्खेसु अम्ह आसम-रुक्खफलाणं च वन्नियं एयं । इय वुत्तुं दुममूलं, पत्ताओ ताउ तेण समं ॥१११॥ तो से सक्करखज्जूर-दक्खपमुहाइँ दिति भक्खाइं । सो तप्फलरसगिद्धो, बिल्लाइसु विम्मुहो जाओ ॥११२।। काऊण तमासन्नं, नियअंगप्फंसणं च कारेंति । उन्नयपओहरे नियउरम्मि ठावंति तस्स करं ॥११३॥ सो जंपइ महिरिसिणो, तुम्हाणं केण कोमलं अंगं ? । कह एए घोरथला, सुकोमला हुंति हिययम्मि ? ॥११४॥ पभणंति ताउ कोमल-करेहिँ तस्संगफंसणपराओ । भद्दऽम्हे सयकालं, भुंजामो एरिसफलाइं ॥११५॥ तब्भक्खणओ देहम्मि, मद्दवं एरिसं हवइ अम्हं । अच्वंतोवचएण य, इमे थला हुंति हिययम्मि ॥११६॥ तो मुंच तुमं आसम-मेयं बिल्लाइविरसफलजुत्तं । आगंतूणं अम्हा-समम्मि अम्हारिसो होसु ॥११७॥ अह विविहभक्खलुद्धो, सो मुद्धो तत्थ ताहि सह गंतुं । गहिऊणं संकेयं, पत्तो नियआसमकुडीए ॥११८॥ संठाविऊण तावस-भंडमसेसं पि तवनिहाणं व । संकेयठाणमेसो, अहिट्ठियं ताहिँ संपत्तो ॥११९॥ तइया य सोमचंदो, रुक्खारूढेहि चारपुरिसेहिं । आगच्छंतो दिट्ठो, कहिओ तासिं च वेसाणं ॥१२०॥ मा सावं देउ इमो, अहं ति भएण सोमचंदाओ । वाहाउ मिगीओ इव, वेसाओ ताउ नट्ठाओ ॥१२१॥
15
20
25
Jain Education International 2010_02
For Private & Personal Use Only
www.jainelibrary.org
