________________
२६०
श्रीधर्मविधिप्रकरणम् अह कोवचलियचित्तो, इत्तो चिंतेइ मंतिणो एए । मारेमि सिरक्केण वि, सव्व सत्थं हि बलियाणं ॥५७॥ तत्तो नियम्मि सीसे, वाहइ हत्थं सिरक्कगहणकए । तं गयकेसं फरिसिय, गहियवयं सरइ अप्पाणं ॥५८॥ चिंतइ मणम्मि धिद्धी, मं रुद्दज्झाणबधंणासत्तं । किं मह तेण सुएणं, अहवा मंतीहि अममस्स ? ॥५९॥ इय चिंतंतस्स तर्हि, पब्भटे मोहमेहतिमिरम्मि । पुणरवि विवेयसूरो, पाउब्भूओ हिययगयणे ॥६०॥ तत्तो पुरट्ठिए इव, अम्हे वंदित्तु सो महासत्तो । आलोइयपडिकंतो, पसत्थझाणं समारूढो ॥६१॥ तेण सुहज्झाणेणं, कम्मं दुज्झाणसंभवं तस्स । झत्ति विलीणं नरवर !, पवणेणं मेहपडलं व" ॥६२॥ अह तस्स रायरिसिणो, सुगइचरिएण वासिओ राया । पुच्छइ सिरिवीरजिणं, केवलसिरिकेलिकुलभवणं ॥६३॥ भयवं ! बालं पि सुयं, रज्जम्मि निवेसिऊण एस सयं । जाओ पसन्नचंदो, कह दिक्खाए कयाणंदो ? ॥६४॥ "अह भणइ जिणो सेणिय !, सुणेसु चरियं पसन्नचंदस्स । पोयणपुरम्मि नयरे , आसि निवो सोमचंदु त्ति ॥६५॥ तस्स य अणुवमगुणरयण-धारिणी धारिणी महादेवी । पुत्तो पसन्नचंदो, मुत्तो पियराण नेहु व्व ॥६६॥ अह अन्नया गवक्खे, नरवइणो संठियस्स सीसम्मि । विवरेइ केसपासं, धारिणीदेवी नियकरहिं ॥६७॥ पिक्खइ तइया एगं, पलियं सीसम्मि सोमचंदस्स । अंकूरनिग्गमं पिव, पढमं वुड्डत्तणलयाए ॥६८॥ भणइ य देवी सहसा, सामिय ! दूओ समागओ एस । अवलोइयदिसिचक्को, भणइ निवो किं न दीसेइ ? ॥६९॥
15
25
Jain Education International 2010_02
For Private & Personal Use Only
www.jainelibrary.org
