________________
२००
श्रीधर्मविधिप्रकरणम् सिरिमहपउमनरिंदे, उदग्गपयडप्पयावपरिकलिए । परिपालते रज्जं, आउहसालाइ अन्नदिणे ॥१४४॥ उप्पन्नं अइफारं, दिणयरबिंबं व वत्तुलायारं । चक्कं रयणमुदारं, सुतिक्खधारं सहस्सारं ॥१४५।। सेसाण वि रयणाई, सपाडिहेराइँ तत्थ जायाई । अह महपउमनरिंदो कारइ अट्ठाहियामहिमं ॥१४६॥ तत्तो पुव्व दिसाए, तं चक्कं ठाइ जोयणं गंतु । राया वि तस्स मग्गेण, जाइ सबलो पइदिणं पि ॥१४७।। पत्तो समुद्दतीरे, कयट्ठमो रहवरम्मि आरुहिओ । आयड्डिऊण चावं, नियनामंकं सरं मुयइ ॥१४८।। सो बारसजोयणम्मि य, मागहतित्थाहिवस्स देवस्स । अत्ताणम्मि निवडिओ, समुद्दमज्झम्मि गंतूण ॥१४९॥ तं पिक्खिय सो कुविओ, केणेस विसज्जिओ सरो मज्झ । महपउमनवमचक्की, नाम दटुं च उवसंतो ॥१५०॥ आगंतूण तओ सो, चूडामणिदाणपुव्वयं भणइ । चक्कवइ एसोऽहं, पुव्वदिसापालओ तुज्झ ॥१५१॥ आणाफलं पहुत्तं ति, तत्थ तं ठविय कुणइ से महिमं । अट्ठदिणाणि तओ सो, संपत्तो दक्खिणदिसाए ॥१५२॥ तत्थ वि वरदामवई, तियसो एमेव साहिओ तेण । पच्छिमदिसाइ पच्छा, पभासतित्थाहिवोऽवि तहा ॥१५३॥ सिंधुनईए देवि, वेयड्ढाहिवसुरं च साहेउं । तुरयारूढो दंडेण, ताडए तिमिसगुहदारं ॥१५४॥ तो किर ( कय )मालो जक्खो, चक्किं नाऊण भिंदइ दुवारे । चक्कीऽवि गुहापवणेण, पेल्लिओ सिन्नमल्लिणो ॥१५५।। तत्तो अद्धबलेणं, सिंधुनई दक्खिणं दिसाभागं । सेणावई पसाहिय, पत्तो महपउमपासम्मि ॥१५६॥
15
25
Jain Education International 2010_02
For Private & Personal Use Only
www.jainelibrary.org
