________________
१९०
श्रीधर्मविधिप्रकरणम् जत्तो जत्तो कीलइ, सो कुमरो तियसकुमरपडिरूवो । तत्तो तत्तो नियसह-यरु व्व संचरइ कुसुमसरो ॥१५॥ तस्स पइणो अलंभे, अप्पं निंदंति सुरवहूओ वि । दंसणसुहरसिया पुण, अणिमिसभावं पसंसंति ॥१६।। इय तम्मि वड्ढते, विण्हुकुमारम्मि जणमणाणंदे । जालादेवी पिक्खइ, एए चउदसमहासुमिणे ॥१७॥ गय १ वसह २ सीह ३ अभिसेय ४ दाम ५, ससि ६ दिणयरं ७ झयं ८ कुंभं ९ । पउमसर १० सागर ११ विमाण भवण १२, रयणुच्चय १३ सिहिं च १४ ॥१८॥ अह एयाइ चउद्दस वयणपविट्ठाइ पिक्खिय पबुद्धा । साहइ तहेव पइणो, सोऽवि मणे हरिसिओ अहियं ॥१९॥ तो जायम्मि पभाए , आहविउं सुमिणपाढगा पुट्ठा । ते वि हु कहंति वरवर ! बाहुत्तरि हुंति सुमिणाई ॥२०॥ बायालीसं असुहाइँ, ताण मज्झे सुहाइँ तीसं तु । तम्मज्झाउ चउद्दस, नियंति जिणचक्किजणणीओ ॥२१॥ तइंसणाओं होही, चक्कवई नंदणो तुह जिणो वा । अह ते पूइय सुमिणयविउसे राया विसज्जेइ ॥२२॥ तत्तो सुहेण गम्भं, उव्वहिऊणं दिणेसु पुन्नेसु । देवी पसवइ पुत्तं, कंतं पुव्व व्व रविबिंबं ॥२३॥ वद्धावणयाइमहे, पुव्वं व कए पइट्ठियं नामं । नंदउ चिरं कुमारो, एस महापउमअभिहाओ ॥२४॥ अह सो पालिज्जतो, पणयजणासाइ सह पवड्ढेइ । मयणमहानवकीलाभवणं पत्तो य तारुन्नं ॥२५।। तरुणीजणमणहरणं तियसाहियरूवमुव्वहंतो सो । सुभगो इव सयलाहिं, कलाहिँ वरिओ सयं चेव ॥२६॥
15
20
25
Jain Education International 2010_02
For Private & Personal Use Only
www.jainelibrary.org
