________________
१३१
षष्ठं धर्मदानयोग्यद्वारम्
एवं च कए एए वि, साहुणो दूरमुक्कमणखोहा । गिन्हंति तुम्ह भवणेसु , भत्तपाणं जहावसरं ॥७७|| जह आणवेइ सामी, तह काहामु त्ति तेहि पडिवन्ने । ते निग्गमयंति दिणे, मुणिणो वि सकज्जउज्जुत्ता ॥७८॥ अह गणहरेण जाणिय, विहारकालं ममत्तरहिएण । सिज्झायरु त्ति विहिणा, कहियमिमं वंकचूलस्स ॥७९॥ भो निवसुय ! तुह वसहि-प्पयाणसाहिज्जमिक्कमासज्ज । इत्तियदिणाइ रहिया, इह अम्हे मणसमाहीए ॥८०॥ इत्तो पुण परिपुन्नो, वट्टइ अवही विहारसमओ य । संपत्तो लक्खिज्जइ, इमेहि पच्चक्खलिंगेहिं ॥८१॥ उच्छू वोलंति वई, तुंबीओ जायपक्कभंडाओ । वसहा य जायथामा, गामा पम्मायचिक्खल्ला ॥८२॥ अप्पोदगा य मग्गा, वसुहा वि य पक्कमट्टिया जाया । अणअक्कंता पंथा, साहूणं विहरिउं कालो ॥८३।। ता भो महायस ! तुमं, परमुवयारि त्ति भन्नसे एयं । गामंतरगमणट्ठा, अणुजाणसु संपयं अम्हे ॥८४॥ जं समणपक्खियाणं, भमरकुलाणं च गोउलाणं च । सरयब्भवमेहाण य, अनियत्ता हुंति वसहीओ ॥८५॥ इय भणिउं मुणिवइणो, गंतुं संपट्ठिया सह जईहिं । तेसिमणुव्वयणट्ठा, पल्लिवई पट्ठिओ तत्तो ॥८६॥ सो सूरीहिँ समं चिय, ताव गओ जाव निययसीमंतं । तो वंदिऊण सूरि पयंपिउं एवमाढत्तो ॥८७॥ भयवं इत्तो उवरि, एसा परदेससंतिया सीमा । ता गच्छह वीसत्था, अहं पि सगिहम्मि वच्चामि ॥८८॥ सो भणिओ मुणिवइणा, नरवरसुय ! जा तए सह ववत्था । धम्माकहणसरूवा, सा संपइ भद्द ! संपुन्ना ॥८९॥
25
Jain Education International 2010_02
For Private & Personal Use Only
www.jainelibrary.org
