________________
११३
पञ्चमं सद्धर्मदायकद्वारम्
अह बीयदिणे भोयण-वेलाए जाव आहवइ देवि । तो चाणक्को निवई, वारइ विन्नायपरमत्थो ॥२५५।। भणइ य तुह आहारो, सविसो न सहेर कह वि देवीए । ता अन्नदिणे एगो, कवलो जा राइणा दिन्नो ॥२५६॥ ता पत्तो चाणक्को, अहो अकज्जं ति जंपिरो सहसा । छुरियं गहाय उयरं, फालिय से कड्ढए पुत्तं ॥२५७॥ धरिओ घयाइमज्झे, पुन्नेसु दिणेसु तस्स पुत्तस्स । जणणीचावियकवलाउ, निवडिओ जेण एयसिरे ॥२५८॥ विसबिंदू ता विहियं, नामं तं चेव बिंदुसारु त्ति । गाहियकलाकलावो, कमेण सो जुव्वणं पत्तो ॥२५९।। अह चंदगुत्तराए, दिवं गए ठाविओ इमो राया । धाईए सिक्खाविओ, वट्टसु चाणक्कआणाए ॥२६०॥ सो तह वÉतो अह, सुबंधुनामेण नंदसचिवेण । भणिओ अपुच्छिओ वि हु , कहेमि तुह पट्टभत्तीए ॥२६१॥ देव न वेससियव्वं, चाणक्के जेण फालियं उयरं । जणणी विणासिया तुह, तो पुट्ठा तेण नियधाई ॥२६२॥ तीए वि इमं कहियं, अह चाणक्कस्स उवरि परिकुविओ । तं आयंतं दटुं, सो झत्ति परंमुहो जाओ ॥२६३।। तत्तो पिसुणपवेसं, चाणक्को जाणिऊण विणियत्तो । नियगिहपत्तो चिंतइ, किं कायव्वं मए इन्हि ॥२६४।। इत्तियकालं विहिओ, इह लोओ सयलसत्तुनिम्महणो । तो संपइ परलोओ, साहेउं जुज्जए मज्झ ॥२६५॥ तो गिहसुत्थं काउं, पत्तयसहियं समुग्गयं खिविउं । मंजूसाए दाउं च, तालए जाइ नयराओ ॥२६६॥ रहिउं करी समज्झे, इंगिणिमरणेण अणसणं लेइ । इत्तो य बिंदुसारो, इय वुत्तो तीइ धाईए ॥२६७॥
__15
25
Jain Education International 2010_02
For Private & Personal Use Only
www.jainelibrary.org
