________________
10
चतुर्थं धर्मदोषद्वारम्
तो रायगिहे नयरे, सिंघाडगचच्चराइठाणेसु । पेसेउं नियपुरिसे, नंदो घोसावए एयं ॥१४९।। जो को वि इत्थ विज्जो, अन्नो वा नंदसिट्ठिणो देहे । रोगाण सोलसन्हं, इक्कं पि हु कह वि अवणेइ ॥१५०॥ तस्स धणउव्वतुट्ठो, सो देइ धणं दरिद्दविद्दवणं । इय दुतिवारं नयरे, सव्वत्थ तेहिँ उग्घुटुं ॥१५१॥ तं सोऊणं विज्जा, मंतियजोइसियपभिइणो य नरा । अहमहमिगाइ ढुक्का, नंदं सेट्टि पडियरेउं ॥१५२॥ एगे वमणविरेयण-उव्वट्टण सेयणाइँ कुव्वंति । अवरे कट्टतिक्खाई, ओसहनियरे पउंजंति ॥१५३॥ सव्वो वि सयणवग्गो, अइउव्विग्गो भमेइ रत्तिदिणं । आराहिज्जंति तहिं च, खित्तगुत्ताइदेवीओ ॥१५४॥ गिन्हिज्जंति य विविहा, अभिग्गहा तक्कुडंबलोएण । पुच्छिज्जंति य बहवे, जोइसिया गहबलाईयं ॥१५५॥ पुइज्जति गहगणा, पइखणमुत्तारणाइँ किज्जति । इच्चाइणो अणेगे, विहिया नंदस्स उवयारा ॥१५६॥ किंतु न केण वि जाओ, लेसं पि हु तस्स रोगउवसामो । किं कम्मजणियवाहीण, होइ दव्वोसहेहिँ गुणो ? ॥१५७॥ अह निम्विन्ना सव्वे, पत्ता विज्जाइया सठाणेसु । तो मरणभयाउरिओ, अट्टज्झाणं गओ नंदो ॥१५८॥ आजम्मगामिएहिं, पढमकसाएहिँ गलियसम्मत्तो । जिणधम्मम्मि जलासय-निसेहदोसं वहंतो य ॥१५९॥ बद्धतिरियाउओ सो, तत्तो मरिऊण तीइ वावीए । मंडुक्कीए गब्भे, पब्भूओ ददुरत्तेण ॥१६०॥ तो पुन्नेसु दिणेसु , नीहरिओ तीइ कुव्विकुहराओ । उम्मुक्कबालभावो य, दद्दुरो कीलइ जलम्मि ॥१६१॥
15
25
Jain Education International 2010_02
For Private & Personal Use Only
www.jainelibrary.org
