________________
७०
श्रीधर्मविधिप्रकरणम् तेण दुतिवारमेवं, वुत्तो वि हु नेव चलइ झाणाओ । किं अयलो चालिज्जइ, पयंडवाउलिसएहिं पि ? ॥१२४॥ अह सो कुद्धो असिणा, सूरणकंदं व्व कुणइ खंडाई । सो वि हु निच्चलचित्तो, तं दुसहं वेयणं सहइ ॥१२५।। अह ताइँ संहरेउं, सो तियसो कुणइ हत्थिणो रूवं । जंगममिव गिरिसिहरं, झरंतमयवारिनिज्झरणं ॥१२६।। अह उल्लालियसुंडो, भीमो जमकिंकरु व्व पच्चक्खो । जलहरमिव गज्जतो, सो जंपइ कामदेवमिमं ॥१२७॥ जइ रे ! न कुणसि भणियं, ता कह छुट्टसि तुमं ति भणिऊण । तं उल्लालइ गयणे, सुंडादंडेण दडयं व ॥१२८॥ कुंतेहि व दंतेहिं, तिक्खेहिं विधए पडतं च । मद्दइ पाएहिँ तओ, मट्टियमिव खिविय भूमीए ॥१२९।। एवं कयत्थिओ वि हु , स महप्पा परमझाणमल्लीणो । तं वेयणं मणागवि, न गणेई वज्जकाउ व्व ॥१३०॥ चिंतइ य सो नियमणे, संपइ जइ खंडियं वयं मज्झ । ता किं अखंडिएणं, पिंडेणं पोसिएण चिरं ॥१३१॥ रे जीव ! सहस संपइ, सवसो हिययम्मि खेयमधरंतो । अवसो सहेसि बहुयं पि, न हु गुणो को वि तुह तत्थ ॥१३२॥ इय झाणलीणहिययं, तं खोहेउं सुरो असक्को सो । मुत्तूण हत्थिरूवं, विलक्खहियओ हवइ सप्पो ॥१३३॥ गुंजारुणनयणजुओ, चलंतजीहाकरालमुहकुहरो । वित्थरियफडाडोवो, विप्फारियफारफुक्कारो ॥१३४।। जंपइ तस्स पुरओ, सो सप्पो दप्पदुद्धरो एवं । किं रे पासंडिय ! नेव, मुंचसे अज्ज वि पइन्नं ॥१३५॥ इअ भणिओ वि न खुब्भइ, तो उच्छलिऊण पच्छिमद्धेण । वेढेइ तस्स देहं, बद्धणं सगडअंगं व्व ॥१३६॥
15
25
Jain Education International 2010_02
For Private & Personal Use Only
www.jainelibrary.org
