________________
३
अट्ठप्पगारिपूजोवरि अट्ठदिटुंतजुत्तं
एवं तवोविहाणं बारसवरिसाण सो चरेऊण । संपत्तो तुंगगिरिं काणणवणमंडियं रम्मं ॥१४।। तत्थ सिलायलवट्टे घणघाइचउक्ककम्मदलणत्थं । आरुहइ सुहज्झाणं निच्चलचित्तो महासत्तो ॥१५॥ तग्गरुयझाणविम्हियमणाहिं गुरुसत्तजणियतोसाहिं । वणदेवयाहिं मुक्का सीसे कुसुमंजली तस्स ॥१६।। झाणानलेण धीरो डहिऊणं घाइकम्मवणगहणं । लोआलोअपयासं उप्पाडइ केवलं नाणं ॥१७॥ उप्पन्ने वरनाणे सहसा देवेहिं छाइयं गयणं । मुक्का य कुसुमवुट्ठी गंधोदयमीसिया सीसे ॥१८॥ वज्जंति दुंदुहीओ नच्चंति सुरगणाओ तुट्ठाओ । गायइ किंनरिसत्था गुणनियरं विजयचंदस्स ॥१९॥ देवा थुणंति तुट्ठा गुरुमोहमहाभडं जिणेऊणं । गहिया सिवसुहलच्छी नाह तए जेसपडाय व्व ॥२०॥ इय सुरसंथुयचलणो संपत्तनरामराए परिसाए । सुरकयकंचणपउमे उवविट्ठो साहए धम्मं ॥२१॥ "जीवो अणाइनिहणो चउगइसंसारसायरे घोरे । जिणधम्मजाणरहिओ निवडइ दुक्खाइं विसहंतो ॥२२॥ चिंतामणि व्व दुलहो मणुयभवो सुकयकम्मरहियाणं । लद्धे वि हु मणुयभवे दुलहो जिणदेसिओ धम्मो ॥२३॥ धम्मस्स दया मूलं दयाए मूलं विसुद्धवरनाणं । नाणे वि हु संपत्ते सुदुल्लहो चरणपरिणामो ॥२४॥
१. सत्थं । २. जय ।
Jain Education International 2010_02
For Private & Personal Use Only
www.jainelibrary.org
