________________
जंबुचरियम् पत्ता य इमे बहुसो, परिभममाणेण एत्थ संसारे । कंतारबंभणो वि य, तह वि न तित्तिं तुमं पत्तो ॥३४॥ जह सरिसमुद्दगाणं, कोविह सुविणम्मि घोट्टिओ नीरं । कुसकोडिबिंदुरोहिं, पियइ अतित्तो जलं अयडे ॥३५॥ तह जो तियसविलासिणिसुरालए विविहजणियभोएहिं ।
पत्तो तुमं न तित्तिं, संपइ कह निव्वुओ होसि ॥३६॥ अन्नं च-तिरियमणुयाण एए, सामन्ना नवर एत्थ लोयम्मि ।
इयरो व्व अओ तम्हा, मा रज्जसु मूढ विसएसु ॥३७॥ पावन्ति नरयवडणं, विसयामिसमूढमोहिया जीवा । चिंतियमेत्तेहिं चिय, तम्हा विरएसु पाएणं ॥३८॥ इय एवं नाऊणं, विवायकडुयत्तणं ति विसयाणं । गंतूण गुरूणंते, कुणसु पुणो संजमं तत्थ ॥३९॥ सत्थंतरम्मि जम्हा, भणियं केणावि साहुणा एयं । तं सुण जेणुप्पज्जइ, वेरग्गं तुज्झ हिययम्मि ॥४०॥ जा एसा उप्पज्जइ, हियए जीवाण भोगतण्ह त्ति । सा भवसहस्सजणणी, संसारनिबंधणकरी य ॥४१॥ गयकन्नतालसरिसं, विज्जुलयाचंचलं हवइ जीयं । सुविणसमा रिद्धीओ, बंधवभोगा घनेभा य ॥४२॥ खणभंगुरे सरीरे, का एत्थ रयी सभावदुग्गंधे । नरयसरिच्छे घोरे, दुगंछिए किमिकुलावासे ॥४३॥ वसकललसिंभसोणियमुत्तासुइरुहिरकद्दमसहावे । वसिऊण गब्भवासे, पुणरवि तं चेव अहिलससि ॥४४॥ एवंविहम्मि देहे, जे पुरिसा विसयरागमणुरत्ता । ते दुहसहस्सपउरे, घोरे हिंडंति संसारे ॥४५॥ एयं चिय मणहत्थी, वच्चंतं विसयसंकडपहेसु । वेरग्गमग्गलग्गो, धरेह नाणंकुसेण तुमं ॥४६।।
Jain Education International 2010_02
For Private & Personal Use Only
www.jainelibrary.org
