________________
तइयो उद्देसो
"जलनिबहुल्लसंतडंडीरयविज्जुलयासरिच्छयं, तरुसिहरग्गलपवणाहयपरिणयफलसमाणयं । सरलतणुद्धभायपरिसंठियसिण्हासलिलचंचलं, आउयं जणस्स न विज्जइ कम्मि खणम्मि वच्चए ॥ जं पि य जियंति लोयया दुसहदारिद्दरोयसोएहिं । परिमिएए जियलोए सुहरहियं तं पि बहुकिलेसेहिं ॥११३॥ [ ] जोव्वणयं पि रूवलायन्नसमुब्भडजणियसोहयं, बहुविहरइविलाससंभोयसहं धम्मत्थजोग्गयं । तरुणिसमूहस्स मणमोहणयं जणलोयणूसवं, तं पि दिणावसा(ण)संझारुणरायसमाणभंगुरं ॥ जोव्वणसमयाणंतरं कुणइ जरा सुंदर पि पुरिसाण । रूवं ववगयसोहयं वलिपलियसमाउलं चलंतदिट्ठीयं ॥११४॥ [ ] महरिहभवणरयणचामीयरसहस्ससंजुया, सुरवेसिणिसरिच्छमुद्धायणअंतेउरसणाहिया । पवरतुरंगवग्गिरोवग्गिरवरकुंजरसमग्गया, हत्थच्छाहिय व्व पलट्टइ एरिसया वररिद्धिया ॥ करिकन्नकलहचवलिया न देइ तं मणसुहं पहुंजमाणिया वि । जं देइ दुहं घोरयं खलरिद्धी थिरा मए मणुययाणं ॥११५॥ [ ] गुरुसिणेहबद्धबंधुयणजणणिकलत्तसत्थओ, एक्कोयरनिउत्थभाइयणपरियणजणसमूहओ । समसुहदुक्खसोक्खवसणूसवओ तह मित्तवग्गओ, सो वि तरुट्ठिउ व्व पक्खिगणओ गोसे पलायओ ॥ इय नाउणं सारयसंसारमणिच्चयासमोत्थयं । जे न कुणंति तवोहयं गुरुविणया ते लहंति दुक्खाई" ॥११६॥ [ ] एवं चिंतंतस्स अपुव्वकरणेण केवलं नाणं । जायं सुक्कज्झाणे सहसा अह वट्टमाणस्स ॥११७॥
Jain Education International 2010_02
For Private & Personal Use Only
www.jainelibrary.org
