________________
॥ पनरसमो उद्देसओ ॥
सरयसमाग[मससहर? ] वियसियवरकमलसरिसवयणाए । एत्थंतरे य भणियं कमलवई नाम भज्जाए ॥१॥ पियसहिओ ! एसऽम्हं होज्ज पिओ नूण पक्खिसारिच्छो ।
इच्छइ जेण सुहाई, निंदह पुण कारणं तस्स ॥२॥ तओ इमं च निसामिऊण वियसंतवयणकमलेण भणियं जंबुणामेण-'को सो सुंदरि! पक्खी ? कहं वा सुहमिच्छइ, सुहस्स य कारणं परिनिंदइ' त्ति? तओ तीए भणियं । अवि य- अत्थि इह भरहवासे, गोउरसुरभवणसालपरिखित्तं ।
अरिजयपुरं पसिद्धं, नयरं सुरलोयसारिच्छं ॥३॥ तम्मि य नयरे अच्छमाणाणं सुहंसुहेण सव्वलोयाणं, अन्नया य समागया अहमा वीसिया । तीए य गओ संवच्छरो । तेण य कया महाअणावुट्ठी । जाओ य दुक्कालो। तओ निवडंति पंसुवुट्ठीओ। धमधमायन्ति महावायाओ। उकंपए मेइणीवीढं । निवडंति निग्घाया। धूमायंति सयलदिसाओ । निवडइ महामुंमुरंगारनिभो दि[ण] यरकरविमुक्को आयवमहासंतावो । तओ एवं च महाउप्पाएसु निवडमाणेसु उच्छन्नाओ ओसहीओ । न रोहंति तणंकुराई । परिसडियपत्ता पायवा न दिति कुसुमफलाई ति । तओ एवं च महारउरवभूयाए मेइणीए कि जायं? विउत्थिया सयले पुहइपाला । उत्थरंति परचक्काई । उव्वसंति गामा । भज्जति महानयराइं । जाव सए जणो(?) सिढि[लि]ज्जंति देवच्चणपूयासक्कारविहाणाइं । न समायरिजंति अतिहिसक्कारा । विसंवयंति गुरुसम्माणपूयणपयाणाई । परिहरिज्जति पणइयणदाणाइं । पमाइज्जति पोरुसाइं । अवमन्निज्जति दक्खिन्नाइं । वंचिज्जंति पुत्तभंडाई पि । आहारगहणवेलाए जोइज्जए जइणो वि पुट्ठी । दुट्ठभज्जाओ य सिढिलिज्जंति भत्तारेहिं ।
Jain Education International 2010_02
For Private & Personal Use Only
www.jainelibrary.org
