________________
१३४
जंबुचरियम् अह अन्नया कयाई संतावियसयलसत्तसंघाओ। पत्तो खलो व्व गिम्हो नि?रखरवायसठूलो ॥२२॥ फरुसो उव्वेवणओ गिम्हो णिद्दहइ सूरकरजलिओ । पलयानलो व्व नज्जइ सयलं भुवणयलजंतुयणं ॥२३।। वाओलिकयवडाओ संतावियसयलभुवणजंतुयणो । गिम्हच्छलेण नज्जइ पत्तो जं रक्खसो एसो ॥२४॥ एयारिसंमि काले समन्तओ सूरकिरणपज्जलिए । मज्झण्हे सो पुरिसो विणिग्गओ निययगेहाओ ॥२५॥ गहिऊणं सो सलिलं पत्तो गिरिपायसंठियं एक्कं । वणसंडमइमहंतं मुक्कं सलिलं तहिं तेण ॥२६॥ पलिछिन्ना तत्थ तरू रइया रासी महंतकट्ठहि । पज्जालिओ हुयासो असोयवरपल्लवसरिच्छो ।।२७।। गिम्हरविकिरणतत्तो उवरिं पासेसु जलणसंदड्डो । तण्हाभिभूयदेहो सलिलं तं जाव संपत्तो ॥२८॥ ता पेच्छइ तो सलिलं वानरजूहेण गिरिनिगुंजाओ । आगंतूणं पीयं नीसेसं कह व चवलेण ॥२९।। अह सो धस त्ति पडिओ मुच्छावसविम्हलो महीवढे । गिम्हखरफरुसमारुयसभंतओ दड्डनियदेहो ॥३०॥ पज्जलियजलणजालावलि व्व संपसरिया अइमहंता । देहं संडहमाणा तण्हा अइदूसहा तस्स ॥३१॥ एवं तण्हायत्तो मुच्छावसम्व(म्भ)लो परायत्तो । संचलिओ घरहुत्तं कह कह वि खलंतसंचारो ॥३२॥ जह जह सो परितप्पइ तह तह खरपवणदाहसंतविओ । तण्हाए बाहिज्जइ वाहीय व लद्धपसराए ॥३३॥ दूसहतण्हापरिसुसियतालुओ मउलियच्छिजुयलिल्लो । निच्चेट्ठो इव पडिओ पुणो वि तत्थेव सो पुरिसो ॥३४॥
Jain Education International 2010_02
For Private & Personal Use Only
www.jainelibrary.org
