________________
१००
जंबुचरियम् ____ अन्नं च, जेसिं विसयाण कारणेणं अभव्वपाणिणो ते पढमं नरयमहंधयारनिवडणकारणं । जओ अच्चंतपाववसगा एए रागद्दोसाण य कारणेणं सोग्गइमग्गग्गलसमभूया, तहा दुग्गइगमणपयडपहभूया य मे णायं च मुहरसियकिंपागफलरससारमेत्ता विवाए उण महाकालकूडविसविवाओवमसमाणा।। भणियं च- "विसयविसं हालहलं विसयविसं उक्कडं पियंताणं ।
विसयविसाइन्नं पिव विसयविसविसूइया होइ" ॥२००॥[उ.मा./गा.२१३ ] तहा एयाणं च विसयाणं परमेक्ककारणं जो एसो अत्थसंचओ सो वि चंचलसहावो। जओ जलजलणतक्करनरिंददाइयाईणं सामन्नो । ताण चुक्को वि धरणितलनिहओ चेव खयं पगच्छइ । तो सव्वहा चंचलसहावा इमा अत्थलच्छी । अवि य- "अथिरा चंचलराया खणभंगुरदिटुनटुसब्भावा ।
विज्जुलया इव लच्छी मणयं पि न होइ थिरभावा" ॥२०१॥ [ ] तहा वि सोहणो जइ इमो खलसंसग्गिसमो जणणिजणयसहोयराईहिं सह संबंधो थिरो होइ । इमो य अवस्सं विओयावसाणो, थोवदियहसंपओगलक्खणो य । ठिओ चेव महासोयाभिभूयाणं संसारभमणदुक्खसंतइयसंपायणपरो हवइ त्ति । भणियं च- "अच्छउ ता अपुणागमपरभवसंकमणजणियसंतावो ।
सुमणे वि बंधुविरहो सुदुस्सहो होइ लोगंमि" ॥२०२॥ [ ] एवमवि सोहणं जइ इमं नियजीयं कइ वि वासरे अविणस्सरसहावं हवइ । इमं च अइचंचलसहावं । तिणकोडिसंठियजललवबिंदुसमाणं । भणियं च- "जललवतरले विज्जुलयचंचले सक्कचायचवलंमि ।
जीवाण जीविए धयचलंमि कह कीरउ थिरासा" ॥२०३॥ [ ] ता सव्वहावि नत्थि एत्थ विलंबकारणं ति । भणियं च- "जं कल्ले कायव्वं अज्जं चिय तं करेह तुरमाणा ।
बहुविग्यो य मुहुत्तो मा अवरण्हं पडिक्खेइ" ॥२०४॥ [ वैरा.श./गा.३] "जलबुब्बुयंमि जीए कयलीगब्भोवमेयसामि । जरवाहिसोगपउरे किं अच्छह निव्वुया इण्हि" ॥२०५॥ [ ]
Jain Education International 2010_02
For Private & Personal Use Only
www.jainelibrary.org
