________________
1. 4. 2. 17.] इत्थिपरिन्नज्झयणे
वत्थाणि य मे पडिलेहेहि अनं पाणं च आहराहि त्ति । गन्धं च रओहरणं च कासवगं च मे समणुजाणाहि ॥ ६ ॥ अदु अञ्जणिं अलंकारं कुक्ययं मे पयच्छाहि । लोद्धं च लोद्धकुसुमं च वेणुपलासियं च गुलियं च ॥ ७॥ कुटुं तगरं च अगलं संपिडं सम्म उसिरेणं । तेल्लं मुहमिञ्जाए वेणुफलाई संनिहाणाए ॥ ८ ॥ नन्दीचुण्णगाई पाहराहि छत्तोवाणहं च जाणाहि । सत्थं च सूबच्छेञ्जाए आणीलं च वत्थयं रयावेहि ॥९॥ सुफणिं च सागपागाएं आमलगाई दगाहरणं च । तिलगकरणिमञ्जणसलागं प्रिंसु मे विहूणयं विजाणेहि ॥ १० ॥ संडासगं च फणिहं च सीहलिपासगं च आणाहि । आदंसगं च पयच्छाहि दन्तपक्खालणं पवेसाहि ॥ ११ ॥ पूगफलं तंबोल्लयं सूइ सुत्तगं च जाणाहि । कासं च मोयमेहाए सुप्पुक्खलगं च खारगालणं च ॥ १२ ॥ चन्दालगं च करगं च वच्चघरं च आउसो खणाहि । सरपाययं च जायाए गोरहगं च सामणेराए ॥ १३ ॥ घाडगं च सडिण्डिमयं च चेलगोलं कुमारभूयाए । वासं समाभिआवण्णं आवसहं च जाण भत्तं च ॥ १४ ॥ आसन्दियं च नवसुत्तं पाउल्लाई संकमहाए । • अदु पुत्तदोहलहाए आणप्पा हवन्ति दासा वा ॥ १५ ॥ जाए फले समुप्पन्ने गेण्हसु वा णं अहवा जहाहि । अह पुत्तपोसिणो एगे भारवहा हवन्ति उट्टा वा ॥ १६ ॥ राओ वि उहिया सन्ता दारगं च संठवन्ति धाई वा । सुहिरामणा वि ते सन्ता वत्थधोवा हवन्ति हंसा वा ॥ १७॥
