________________
पेच्छइ य तं कुमारं, महिन्दतणया नरिन्दमग्गम्मि । पुलयन्ति न य तिप्पइ, कुवलयदलसरिसनयणेहिं॥३८ ।। पवणंजएण वि तओ, पासायतलट्ठिया पलोयन्ती। दूरं उब्वियणिज्जा, उक्का इव अंजणा दिट्ठा॥३९ ॥ तं पेच्छिऊण रुट्ठो, पवणगई रोसपसरियसरीरो। भणइ य अहो ! अलज्जा, जा मज्झ उवट्ठिया पुरओ॥४०॥ रइऊण अंजलिउडं, चलणपणामं च तस्स काऊण । भणइ उवालम्भन्ती, दूरपवासो तुमं सामी॥४१ ।। वच्चन्तेण परियणो, सव्वो संभासिओ तुमे सामि । न य अन्नमणगएण वि, · आलत्ता हं अकयपुण्णा॥४२ ।। जीयं मरणं पि तुमे, आयत्तं मज्झ नत्थि संदेहो। जइ वि हु जासि पवासं, तह वि य अम्हे सरेज्जासु॥४३ ॥ एवं पलवन्तीए, पवणगई मत्तगयवरारूढो। निग्गन्तूण पुराओ, उवट्ठिओ माणससरम्मि॥४४ ॥
विज्जाबलेण रइयो, तत्थ निवेसो घरा-ऽऽसणाईओ। - ताव च्चिय अत्थगिरि, कमेण सूरो समल्लीणो॥४५ ॥ .: पवणवेगेण अंजनाअ सुमरणं ..
अह सो संझासमए, भवण- गवक्खन्तरेण पवणगई। पेच्छइ सरं सुरम्मं, निम्मलवरसलिलसंपुण्णं ॥४६ ॥ मच्छेसु कच्छभेसु य, सारस-हंसेसु पयलियतरंगं । गुमुगुमुगुमन्तभमरं, सहस्सपत्तेसु संछन्नं ॥४७ ॥ अइदारुणप्पयावो, लोए काऊण दीहरज्जं सो। अत्थाओ दिवसयरो, अवसाणे नरवई चेव॥४८॥ दियहम्मि वियसियाई, निययं भमरउलछड्डियदलाई। मउलेन्ति कुवलयाई, दिणयरविरहम्मि दुहियाई॥४९ ॥ अह ते हंसाईया, सउणा लीलाइउं सरवरम्मि। दटुं संझासमयं, गया य निययाइँ ठाणाइं॥५०॥ तत्थेक्का चक्काई, दिट्ठा पवणंजएण कुव्वन्ती। अहियं समाउलमणा, अहिणवविरहग्गितवियंगी॥५१ ॥
१४२
