________________
प्रवचन-सारोद्धार
११३
निस्संकिय निक्कंखिय निव्वितिगिच्छा अमूढदिट्ठी य। उवबूह थिरीकरणे वच्छल्ल पभावणे अट्ठ॥२६८ ॥ पणिहाण जोगजुत्तो पंचहिं समिईहिं तीहिं गुत्तीहिं । चरणायारो विवरीययाई तिण्हंपि अइयारा ॥२६९ ॥ अणसणमूणोअरिया वित्तीसंखेवणं रसच्चाओ। कायकिलेसो संलीणया य बज्झो तवो होह ॥२७० ॥ पायच्छित्तं विणओ वेयावच्चं तहेव सज्झाओ। झाणं उस्सग्गोऽवि य अभितरओ तवो होइ ॥२७१ ॥ सम्ममकरणे बारस तवाइयारा तिगं तु विरिअस्स। मणवयकाया पावपउत्ता विरियतिगअइयारा ॥२७२ ॥ संका कंखा य तहा वितिगिच्छा अन्नतित्थियपसंसा। परतित्थिओवसेवणमइयारा पंच सम्मत्ते ॥२७३ ॥ पढमवये अइआरा नरतिरिआणऽन्नपाणवोच्छेओ। बंधो वहो य अइभाररोवणं तह छविच्छेओ ॥२७४ ॥ सहसा कलंकणं रहसदूसणं दारमंतभेयं च । तह कूडलेहकरणं मुसोवएसो मुसे दोसा ॥२७५ ॥ चोराणीयं चोरप्पयोगजं कूडमाणतुलकरणं । रिउरज्जव्ववहारो सरिसजुई तइयवयदोसा ॥२७६ ॥ भुंजइ इतरपरिग्गहमपरिग्गहियं थियं चउत्थवए। कामे तिव्वहिलासो अणंगकीला परविवाहो ॥२७७ ॥ जोएइ खेत्तवत्थूणि रुप्पकणयाइ देइ सयणाणं । धणधन्नाइ परघरे बंधइ जा नियमपज्जतो ॥२७८ ॥ दुपयाइं चउप्पयाइं गब्भं गाहेइ कुप्पसंखं च । अप्पधणं बहुमोल्लं करेइ पंचमवए दोसा ॥२७९ ॥ तिरियं अहो य उठें दिसिवयसंखाअइक्कमे तिन्नि । दिसिवयदोसा तह सइविम्हरणं खित्तवुड्डी य ॥२८० ॥
Jain Education International
For Private & Personal Use Only
www.jainelibrary.org
