Jugaijinandachariyam

SR No.: 001593
Original Sutra Author: Vardhmansuri
Author: Rupendrakumar Pagariya, Dalsukh Malvania, Nagin J Shah
Publisher: L D Indology Ahmedabad
Publication Year: 1987
Total Pages: 322
Language: Sanskrit
Classification: Book_Devnagari, Literature, & Story
File Size: 8 MB

Page 77

जुगाइजिणिद-चरियं
नयरारक्खियपुरिसेहिं पावियं । निवेइयं गइणो । समाइट्ठमणेण-"चिरं विडंबिऊण विकरणं करेह । अण्णो वि जो मह पुरे अणायारकारी सो एवं चेव कायव्वो” । तओ तिणमसिविलितगत्तं, बुडरासहारोवियं, उवरि धरियछित्तरायवत्तं, अविवेयजण-जणिय-कोलाहलं, पए पए हम्ममाणं कसाइपहारेहिं पत्तं उज्जाणसमासण्णमसाणसंठियसूलासमीवे समारोविओ सूलाए वणियनंदणो। विगय-घाण-सवणा कया बंभणदारिया। जलियजलणं पवेसिऊण मया। नट्टरइणा भणियं"भयवं ! महई अणत्थ-परंपरा।" सूरिणा भणियं-"भद्दमुह ! परघरवसणमेयं । जं पुण सघरे चेव तुह वसणं तं पि समासण्णं वट्टइ।" नट्टरइणा भणियं-"कहं ति।" सूरिणा भणियं-"अलं, सयलजणसमक्खं इमाए संकहाए । अह ते निब्बंधो तो संपयमेव एत्थेव संठियाणं पयर्ड भविस्सइ।" एयं सूणिय अणक्खभरभरियमाणसा अपडिवण्ण-धम्मगुणा सघरं पइ पत्थिया चंदमुही। अंतरा दिट्ठो पुव्वपरिचिओ कुलपुत्तओ। संवढिओ पणओ, वियंभिओ मयरद्धओ, पविट्ठाणि नयरासन्नमुज्जाणं, पयट्टोअणायारो। दिद्वाणि तलवरेणं । दढं कयत्थिऊण दंसियाणि राइणो। नरवइणा भणियं-"भो किमेयं ?" अलिय-धत्तणेण जंपियमणेहि-देव! “अलियवाई दूज्जणो जणो।" धराहिवेण भणियं-"को एत्थ पच्चओ?" तेहिं भणियं-"सुज्झामो खरमुह-जक्ख-पुरओ।" तलवरेण भणियं-“देव! जइ एयाणि विसुज्झति मुच्चत्तं कळं खरमुहो न जक्खो।" रना भणियं-रे ! "सुझंतु, कि तुह वियारेण? ।" तओपउरपुरजण-परिवारियाणि गयाणि खरमुह-उज्जाणं, जल पियंकरायरिओ जणाण धम्मं वज्जरंतो चिद्रइ। कमेण पत्ताणि जक्खाययणं । विहिय-जल-सोयाणि करे काऊण अट्ठट्ठयंपुप्फाणि ठियाणि वीसहत्यंतरे पएसे। पूरओ होऊण भणियं देवच्चएण-"भो! जो एत्थ निद्दोसो सो नियत्थवत्थो गच्छ; तहेव नियत्तइ। इयरो पुण सवत्थो गच्छइ, विवत्थो वलइ । अओ सम्मं निरूविय सुद्धी कायव्वा । 'जक्खो पमाणं' ति भणमाणाणि चलियाणि, ताणि पत्ताणि जक्खपायंतियं । पूइओ अट्ठसु अंगेसु अट्ठपुप्फीए कुलपुत्तएण खरमुहो। तयणु चंदमहीए। कप्पो त्ति कलिऊण काऊण पणामं दाहिणपायंगट्ठए छित्तो कुलपुत्तएण। इयरम्मि इयरीए वलियाणि जा वच्चइ कइवयपयाणि । नागच्छंति, ताव विगलियवत्थाणि जहा जायाणि जायाणि ॥४४०॥
तओ अविवेयजणजणियकोलाहलाणि, विवेइजण-पायडिय-वेरग्गाणि, लज्जाविय सुहिसयणवग्गाणि पत्ताणि इंगियपएसं । तओ नियत्थवत्थाणि चालियाणि नयरारक्खिएण मसाणाभिमहाणि । निरूवियाणि सविसाय-सविम्याए सयलपरिसाए। पत्ताणि मसाणं। कओ सूलातिही कुलपुत्तओ। चंदमही वि विगयघाण-सवण-दसणच्छेया-मरणसमए वि असंजायपच्छायावा बहुजणधिक्कारमसहमाणी रुद्दज्झाणोवगया दसणेहिं रसणं छेत्तूण मया छट्ठ-निरय-पुढवीए गया। परिसाए भणियंभयवं! "कहमेसा अचितियं वसणं पाविया ?" सूरिणा भणियं-“समासन्ना चेव पाणिणं वसणसवा न एत्थ विसाओ विम्हओ वा कायव्वो।" तं सुणिय संविग्गा लोया। जहारिहं पडिवण्ण-धम्मगुणा वंदिऊण सूरि-पय-पंकयं जहागयं गया। नट्टरइ-गीयरईहिं भणियं-भयवं ! “कुडंबभारे ठविऊण नियसुए' कयकरणिज्जा तुम्हाण अंतिए पव्वयामो।" सूरिणा भणियं-"अविग्धं भे भवउ।" तओ वंदिऊण पियंकरायरियं गीयरइ-नट्टरइणो सघरमागया । अणुण्णविय-सुहिसयणवग्गा, कुडुंबवावारे संठविय-नियपुत्ता, जिणाययण-विहिय-अट्टाहिया-महिमा, महादाण-पभाविय-जिणपवयणा, महाविभूईए, समं चंदाणणाए, पियंकरायरियसमीवे निक्खंता गीयरइ-नट्ट-रइणो। समप्पिया चंदाणणा पसमसिरी-पवत्तिणीए। परिपालिय-निरइयार-पव्वज्जा, विहि-विहिय-संलेहणा, चउन्विहाहार-कयाणसणा समाहि-मरणेण मरिऊण एगावयारा सव्वळे सुरवरा जायं ति।" ता महाराय! एवं विलवियं गीयं, विडंबणा नटुं, भारा आभरणा, दुहावहा काम त्ति । संभिण्णसोएण भणियं-"सयंबुद्ध ! " गयणंगण-पडण-संकिरटिट्टिहडी-उड्ढपाय-सुयण-संनिहं ते मंतियं । मुह-कुहरंतर-गय-मंसपेसि परिहरियकोल्हुय-मीण-पत्थण-सरिस भवओ चेट्टियं । संपत्तत्थ-परिहारेण असंपत्तत्थ-पत्थणं मयमायण्हियाहिलाससरिसं वयंति वियक्खणा। जइ चोरा विज्जति तो कि पंथा न गम्मति ? जइ विसूइयाए मरिज्जइ तो कि न भुज्जइ ? जइ थेरेहिं होयव्वं तो कि पढममेव थरथरंत-गत्तेहिं दंड-विलग्गेहिं भमियव्वं ? जइ हरिणा विज्जति कि जवा न वुप्पंति? जइ रायाणो दंडंति तो कि अहिगारा न घिपंति? जइ पच्छा मरियव्वं तो कि पढममेव मसाणे पत्थरियव्वं? ता भुंजउ ताव देवो पुव्वभवसमज्जिए सुरसंदरीहिं च उन्नय विसालसाहिं रइरूवधारिणीहिं रायकूलवालियाहिं समं माणुस्सए कामभोए। पच्छा समुचिय-सुयसंचारिय-रज्जकज्जो धम्म कारस्सइ । यतः १ कहि चिय पा० । २ तंच सुणि पा० । ३ नियसुयंकय जे । ४ निरवज्ज प० पा० ।
.