Page Text
________________
१८२
जुगाइजिणिदचरियं
रयणे नव य महानिहओ एए णं सिरिघरंसि उप्पण्णा सेणावइरयणे वड्ढइरयणे पुरोहियरयणे। एए णं चत्तारि मणयरयणा विणीयाए रायहाणीए समुप्पण्णा आसरयणे हत्थिरयणे एएणं दुवे पंचेंदियरयणा वेयड्ढापव्वयमूले समुप्पन्ना इत्थिरयणे उत्तररिल्लाए विज्जाहरसेढीए समुप्पण्णे । तए णं भरहे राया वंदेइ च सोमयाए सयलजणमणनिव्वुइकरे सागरु व्व थिमिए धणवइ व्व भोगसमुदयसमुप्पण्णे परमविक्कमगुणे अपराजिए समरसयसहस्सेसु अमरवइसमाणरूवे मणयवई अखंडछक्खंडमेरा वट्टावए। चउद्दसण्हं रयणाणं, नवण्हं महानिहीणं, सोलसहं देवसाहस्सीणं, बत्तीसाए मउडबद्धरायसाहस्सीणं, बत्तीसाए वररायकण्णया साहस्सीणं, बत्तीसाए जणवयपहाणकण्णयासाहस्सीयं बत्तीसाए बत्तीसइबद्धाणं नाडग सहस्साणं, तिण्हं तेवढाणं सूयार-सयाणं अट्ठारसण्हं सेणिप्पसेणीणं, चउरासीए दंतिसयसहस्साणं चउरासीए यसयसहस्साणं, चउरासीए रहसयसहस्साणं, छण्णउईए मणयकोडीणं, बावत्तरीए पुरवरसहस्साणं, बत्तीसाए जणवयसहस्साणं, छण्णउईए गामकोडीणं, नवनउईए दोणमहसहस्साणं, अडयालीसाए पट्टणसहस्साणं, चउवीसाए कब्बडसहस्साणं, चउवीसाए मडंबसहस्साणं, वीसाए आगरसहस्साणं, सोलसण्हं खेडगसहस्साणं, चोदसण्हं संवाहसहस्साणं, छप्पण्णाए अंतरोदगाणं, एगणपण्णाए कूरुज्जाणं, विणीयाए रायहाणीए चल्लहिमवंतगिरिसागरमेरागस्स य केवलकप्पस्स भरहवासस्स । अन्नेसि च बहुणं राईसर-तलवर-माडंबियकोडुंबिय-सेट्ठिसत्थवाहप्पभिईणं, आहेवच्चं पोरेवच्चं सामित्तं भट्टित्तं आणाईसरिय सेणावच्चं करेमाणे पालेमाणे विहरइ। जाहे बारसवारिसिओ रायाभिसेओ वत्तो, रायाणो सव्वे वि सट्टाणं विसज्जिया। ताहे भरहाहिवो नियसयणवग्गं सरिउमारद्धो। दाइज्जति निउत्तपुरिसेहिं सव्वे वि नियल्लगा। एवं परिवाडीए दुक्करतवतणुयंगी पणदुरूवलायण्णा कसिणपक्खससिकल व्व परिखीणसरीरसोहा, खोमपंडुरकवोला दंसिया सुंदरी। सा य जद्दिवसमेव पव्वयंती निरुद्धा तद्दिवसमेव आयंबिलाणि करेउमारद्धा । तेवि तं तहाविहं पासिय रुट्ठो भरहाहिवो ते कोडुंबियपुरिसे एवं वयासी-"अरे किं न संपज्जइ मह घरे असणाईयं वेज्जा वा न संति जेणेवंविहा सुंदरी जाया ?" तेहिं भणियं"सामि ! सव्वं संपज्जइ, परं जावइओ देवाणप्पियाणं भरहसाहणकालो तावईओ संदरीए आयंबिलाणि कूणमाणीए वोलीणो। तं सुणियसंजायपयणुरागेण भणिया संदरी भरहेण--"सुंदरि! अलं निब्बंधेण, जइ भे रोयइ तो मए सह भोगे भुंजाहि। अह न तो पब्वयाहि ।” सुंदरी भणइ--"पब्वयामि।" मुक्का, पव्वइया। वच्चइ कालो।
अण्णया भरहो तेसिं नियभाउगाणं पुरिसे पेसेइ भणावेइ य--"एह, मह सेवं करेह ।" मए रज्जाणि दिण्णाणि भुंजह।" तं सुणिय ते भणियाइया-"अम्हाण वि तुम्हाण वि रज्जाणि ताण दिण्णाणि । तो एउ ताओ जं सो भणिही तं काहामो। तेसिं मणं नाऊण तम्मि समए अहाविहारेण विहरमाणो भगवं पि अट्टावयमागओ। कय महासन्निहियदेवेहिं समवसरणं । समागया लोया। एयं सुणियपहट्टमहपंकया समागया वंदणवडियाए नागरया। नवदिवायरकरकरंबियकमलं व वियसंतवयणा समागया सव्वे वि कुमारा । तिक्खुत्तो आयाहिण-पयाहिणं काऊण भवावड-निवडंतजंतुसंताणसमुद्धरणं-रज्जुणो कलिकाल-कलिल-कवलण-जंगम-तित्थस्स असारसंसार-कयवर-कमलकप्पस्स दीणाणाहजगजीव-निक्कारण-बंधुणो जुगाइतित्थयरस्स पणमिऊण पय-पंकयं नच्चासण्णे नाइदूरे निसण्णा।
सयलजगजीवसुहओ परोवयारेक्ककरणतल्लिच्छो। ससि-संख-धवलनियजसधवलीकयतिहुयणाभोगो ॥१८१४।। अह भणइ भुवणनाहो सव्वसभासाणुगाए वाणीए। चंदो व्व चंदिमाए बोहितो भवियकुमुयाइं ॥१८१५॥ केवलनाणदिवायरकरनियरक्कंतसयलतेलोक्को । सयलजियाण समं चिय संसयतिमिरं पणासिंतो ॥१८१६।।
लद्धावसरेण तओ जाणंते णावि उसभसेणेण । भरहपिया भुवणगुरु रिसहजिणो पुच्छिओ एवं ।।१८१७।। जीवस्स किं सरूवं केहि विहेहिं बंधए कम्मं । संसारो य कइविहो सवित्थरं कहसु मे एयं ।।१८१८॥ अह भणइ भुवणबंधू जोयण-वित्थारणीए वाणीए । पुंडरिय ! सुणसु संपइ सवित्थरं जं तए पु४।१८१९।। जीवो अणाइनिहणो अविणासी अक्खओ धुवो निच्चो। दव्वट्ठाए' सो च्चिय परियायगुणेहिं य अणिच्चो ।।१८२०॥
१ तियलोक्को पा० । २ लोय पडिबोहणत्थं जाणं. पा० । ३ किं जीवस्स पा० । ४ कहिं वि हेऊहिं पा० । ५ संसारो यइ जे०। ६ जंपए पुव्वं जे० । ७ दिव्वद्धयाए सो विय पमा० जे० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |