Page Text
________________
सिरिरिसहसामिवण्णणं
गणहरनामकम्मोदएणं माउयापयाणि निसामिऊण तक्खणा चेव एगारस-अंगाणि चोद्दसपूव्वाणि य विरयंति। एत्थंतरे रयणमयथाले दिव्वचुन्ने काऊण चउव्विदेवनिकायसंपरिवुडो सक्को समुवट्ठिओ। तओ अणुपरिवाडीए परिसं ठियाणं उसहसेणपामोक्खाणं चउरासीगणहराणं चुन्नक्खेवपुरस्सरं सुत्तेणं अत्थेणं तदुभएणं सव्व-दव्वं गुण-नय-पज्जवेहिं भगवं अणुओगाणुन्नं गणाणुन्नं च करेइ। देवदुंदुहिनिनायपुरस्सरं सक्काइया सुरगणा भरहवइपमुहनरनारिगणा य वासनिक्खेवं कुव्वंति। ते वि भगवंतो विणओणयाविहियकरयलंजलिणो भगवओ वयणाणि सम्मसंपडिपुच्छंति । तओ भगवं तेर्सि गणाणुन्नं च अणुओगं च अणुनाणिऊण पुणो वि पुव्वाभिमहो सिंहासणे निसन्नो पारद्धो अणुसट्टिगभं धम्मदेसणं
। एत्थंतरे अवसरं लहिऊण पुच्छिओ सिरिप्पह-सेट्रिणो--"भयवं! मह सूया सिरिसेण-वीरसेणा तुल्लदाणाइधम्माणुट्टाणे अन्नमन्नमणुरत्ता एगम्मि पल्लंके रयणीए दोवि नुवण्णा अहिणा डक्का कालगया कहिं उववन्ना?" भगवया भणियं-“एगो सोहम्मसक्कसामाणिओ सुरवरो। बीओ पुण कालमुहाए महाडवीए महाभुयंगमो। तं सुणिय जणबोहणत्थं जाणंतेण वि पुट्ठो तित्थयरो उसभसेणगणहरेण-- "भयवं! कि कारणं तुल्लधम्माणवाणेण वि ताण एरिसो फलविसेसो?" भगवया भणियं--"तुल्लकिरियाण वि जीवाण परिणामविसेसेण फलविसेसो दिट्ठो। तं जहा--
जीवो अणाइसुद्धो लेसाण तमेण बंधए कम्मं । बंधस्स विसुद्धलेसो थेवं बहुयं असुद्धाए ॥१६०७।। किण्हा-नीला-काऊ तेउ पम्हा य होइ सुक्का य। छच्चेव इमा भणिया संसारे जीवलेसाओ ॥१६०८॥ जह फलिहपत्थरम्मि कसिणे नीले व पीयरत्ते व्व। उवहाणे तं फलिहं जा पज्जुवहाण समवन्नं ।।१६०९।। अप्पा वि तह विसुद्धो फलिहमई उच्चनियसहावेण । कसिणाइकम्मपोग्गलजोए कसिणत्तणं जाइ॥१६१०।। जारिसयं तं कम्म कसिणं नीलं व पीयपउमं वा। तारिसओ से भावो जंबूफलभक्खणा हरणे ॥१६११॥ गामाओ छप्पुरिसा भत्तं घेत्तण निग्गया रन्नं। सब्वे वि परस-हत्था किर दारुं छिदिमो अम्हे ॥१६१२।। गहणं च ते पविट्ठा पेच्छंति य तरुवरे महाकाए। एक्कम्मि तरुवरम्मि भत्ताई ठावियं तेहिं ॥१६१३।। अह छिदिउं पवत्ता भमिउं रन्नम्मि ते महारुक्खे। ता तम्मि भत्तरूक्खे समागया वानरा बहवे ॥१६१४।। अह तेहिं चडियरुक्खे भत्तं भोत्तूण भायणे भग्गे। अह लुंपिऊण सव्वं पडिपहहुत्तं गया पवया ॥१६१५।। वछिदिया वि पुरिसा मज्झण्हे तिसियभुक्खिया सव्वे । किर भुंजिमो त्ति इण्हितं भत्ततरं समल्लीणा ।१६१६।। पेच्छंति न तं भत्तं न भायणे कप्पडेयफालियए । अह नायं तेहिं जहा वानरजूहं समल्लीणं ॥१६१७॥ ता संपइ छुहियाणं का अम्हाणं गइ त्ति चिंतेमो । वण'फुल्लफले असिमो वणम्मि अन्नेसिमो सव्वे ।।१६१८।। एत्थंतरम्मि कालोदरपच्चिरजंबुपिक्क सहयारो । पढमुव्वट्टमहीरयपसरियवरगंधगंधड्ढो ॥१६१९।। अह एरिसम्मि काले तम्मि वणे तेहिं अनिसंतेहिं । दिट्ठो जंबुयरुक्खो फलभरभज्जतबहुसाहो ।।१६२०।। दट्ट ण छ वि पुरिसा तुट्ठा ते मंतिउं समाढत्ता । संपेइ पत्ता जंबू भणह कहं भक्खिमो पुरिसा ॥१६२१।। एक्केण तत्थ भणियं परसू अम्हाण अत्थि सव्वाण । मा कुणह आलसं भो ! मूलाओ छिदिमो एयं ।।१६२२॥ छिन्ना पडिही एसा कड़यडरावं चडचडम्मि कुणमाणा। पडियाए पक्खएणं भक्खिस्सं पक्कजंबूणि ।।१६२३।। एयं च निसामेउं भणियं बीयेण तत्थ पुरिसेणं । छिन्नाए इमाए तुम्हं को च गुणो भणसु मूलाओ ॥१६२४।। छिज्जंतु इमाए भो! साहाओ खंधदेसलग्गाओ । पडियासु तासु अम्हे भक्खिस्सामो वर-फलाणि ।।१६२५।। तइयपुरिसेण भणियं मा मूलं मा य लुणह साहाओ। छिंदह पडिसाहाओ जा सुफला संठिया भक्खा ।।१६२६।।
१. निस्संकाऊण जे०। २. गणहरिंदाणं पा०। ३. कुणंति पा०। ४. लेसाण जसाण बंधए कम्म पा० । ५. भक्खमाहरणा पा०। ६. छायाणं पा०। ७. वण पुप्फफले पा०। ८. बुपक्क पा० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |