Page Text
________________
१२०
जुगाइजिणिद-चरियं
इयरेण मायापच्चइयं तिरियाज्यं बद्धं । भणियं च-- उम्मग्गदेसओ मग्गनासओ गूढहियय माइल्लो । सढसीलो य ससल्लो तिरियाउं बंधए जीवो ॥१०७६ ॥
दाणसूरत्तणेण भोगभूमीए सेओ चउदंतो सत्तंगपइट्ठिओ हत्थी पच्चायाओ जाहे ते य पडुप्पण्णावएणं ताहे तेसि अन्नमन्नं दह्ण अईव पीई समुप्पण्णा । यत:--
यं दृष्ट्वा वर्द्धते स्नेहः क्रोधश्च परिहीयते । स विज्ञेयो मनुष्येण एष मे पूर्वबांधवः ।। यं दृष्ट्वा वर्द्धते क्रोधः स्नेहश्च परिहीयते । स विज्ञेयो मनुष्येण एष मे पूर्ववैरिकः ॥ १०७७ ।।
जो सो मायावी तेण ताए मित्ताइसंधणयाए' आभिओगिकं कम्मं निव्वत्तियं तं ताहे ओइण्णं । तओ तेण हत्थिणा तं मिहुणयजयलयं खंधे विलइयं । तओ तं हत्थि-खंधमारूढं भमंतमवलोईऊण सव्वो वि मिहुणगलोगो विम्हियमाणसो चितेउमाढतो--"अहो ! अम्हेहितो अब्भहिओ एस मणूसो जेण एवं ललइ इमं च से विमलवाहणं' ति मिलिऊण ते मिहणगा नामं करेंति 'विमलवाहणो'त्ति । तेण पुण विमलवाहणेण सुसम्मपुरसामिणो समरसैणनरवइणो सेयं चउदंतं पुत्वभवे हत्थिरयणं दिवमासि । तओ समवण्णं समदसणं नियवाहणं दट्ठण पुव्बजाई सरिया । एवं सो जाईसरो सयलनीइनिउणो तेसि मिहुणगाण माणणिज्जो कालं गमेइ । कालदोसेण य तेसि मणूसाणं तेसु रुक्खेसु ममतीभावो जाओ । जो ममीकए समल्लियइ तस्स न सहंति, ताहे ते असहंतगा मिलिऊण भणंति--'एस विमलवाहणो अम्हेहितो अहिगो, जस्स एस दाही तस्स रुक्खा भविस्संति ।' एवं भणिऊण तं उवट्टिया कलहकारणं तस्स साहिति । ताहे सो भणइ-- मा भिडह तुभं इमे रुक्खा, इमे य पुण तुब्भं ।' इच्चाइ मेरं ठवेइ । भणइ य--'जो एय मेरं तुम्हाण अइक्कमइ सो मह कहेयव्यो । एयं च मज्जायं तुब्भे पुण परंपरएण सव्वत्थ ठवेह । जहा-परिग्गहिएसु रुक्खेसु अण्णेण न सामित्तणं कायव्वं ।" एवं तेण मेरा ठविया । “जो एयं मेरं लंधिस्सइ तस्साहं डंडं वत्तेहामि ।" ताहे तेसि मिहुणगाणं जो कोइ तं मेरं अवरज्झइ सो तस्स उवट्ठविज्जइ । ताहे सो तस्स दंडं वत्तेइ । को पुण दंडो? 'हक्कारो'--"हा ! तुमे दुठ्ठ कयं, सो तेण हक्कारेण जाणइ सीसं मे पडियं । छायाधाओ जाओ । वरि अहं मारिओ मा हक्कारिओ'त्ति । तस्स पुण विमलवाहणस्स चंदस्सेव चंदिमा चंदजसा नाम भारिया । सो तीए सह सिणेहसारं विसयसुहमणुहवंतो कालं कमेइ । किंचि सावसेसाऊया चंदजसा चक्खुमं चंदकंताभिहाणं जुवलयं पसवइ । कइवयदिणाणि तमवच्चजुवलयं परिपालिऊण विमलवाहणो सुवण्णकुमारेसु देवेसु उववण्णो । चंदजसा हत्थी य नागकुमारेसु । चंदकंता वि तहेव जसवं सुरूवाभिहाणं जुवलयं पसूया । परिपालियजुवलो चक्खुमं सुवण्णकुमारेसु उववण्णो । चंदकंता पुण नागकुमारेसु । एवं अवसप्पिणीए किंचि किलित्तणओ कालस्स हक्कारं लंघयंताण ताण मिहुणगाण एसा अहिणवा दंडनीई । वीया मक्कारलक्खणा पवत्ता । वच्चंतेसु दिणेसु सुरूवा जुवलयं पसूया अभिचंदो मिहुणगो पडिरूवा मिहुणगा । कि चि कालं तं मिहुणयं परिपालिऊण जसवं उदहिकुमारेसु सुरूवा नागकुमारेसु उववण्णा । पुव्वत्ताओ चेव एत्थ वि दंडनीईओ पडिरूवा वि अभिचंदेण सह विसयसुहमणुहविऊण किंचि सावसेसाउया पसेणइ चक्खुमंताभिहाणयं जुवलयं पसूया । तं च परिपालिऊण कालमासे कालं किच्चा अभिचंदो उदहिकुमारेसु, पडिरूवा नागकुमारेसु उववण्णा । पसेणइ काले दोण्णि पुवुत्ताओ दंडनीईओ । तईओ वि धिक्कारो पयट्रो, सप्पणयं पसणइणा सहाभिरमंती चक्खमंता वि मरुदेवसिरिकंताभिहाणं चक्खु दरिसणियं जुवलयं जाया। तं परिपालिऊण अहाउयक्खएण मरिऊण पसेणई दीवकुमारेसु भवणवईसु उववण्णो। चक्खुमंता पुण नागकुमारेसु । मरुदेवकाले वि ताओ चेव तिन्नि दंडनीईओ। सिरिकता वि मरुदेवेण सह चिरकालं संसारसुहमणुहविऊण अवसाणसमए नाभीमरुदेवाभिहाणं निरुवमसिरिसंगयं मिहुणयं पयाया । मरुदेवकाले वि हक्कार-मक्कारधिक्कारलक्खणाओ तिन्नि चेव दंडनीईओ । मरुदेवो वि तं मिहणयं किं चि कालं परिपालिऊण निययाउयपरिक्खए
१. संधणाए जे० । २. ठवेहा परि० जे० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |