Page Text
________________
६८
सिरिचंदप्पहजिणचरियं
मणिरयणकणयभूसणझणज्झणारावरम्मगमणाहिं । सह निययपिययमाहि, झड त्ति पत्तो तमुद्देसं ।। १७५१ ॥ परसुनिकिंतं चंपयलयं व, नववल्लरिं व पवणहयं । भूमीए निवडियं तो, पेच्छइ रुइरं वरं नारिं ।। १७५२ ॥ धरणीलुलंतकरचिहुरपासमवलोइऊण मुच्छाए । वियलतणुं तणुयंगिं राया वि हु सोयमावन्नो ।। १७५३ ।। कारवइ तयणु सिसिरोवयारममलेण मलयजरसेण । वीयावेइ य मंदं लहुमणहरतालियंटेण ॥ १७५४ ।। लद्धाए चेयणाए, परिवारंतीए पुच्छइ नरिंदो । का एसा किं व इमीए होज्ज मुच्छानिमित्तं ति ? ।। १७५५ ।। तो भणइ सोविदल्लो, तीसे नरनाह ! सुव्वउ इमीए । वुत्तंतो एस पिया, दुहिया निवरायसिंहस्स ।। १७५६ ।। हिरिमइनामेण जणम्मि विस्सुया सुस्सुया सुसीलड्ढा । तुमए च्चिय परिणेउं, नियगेहिणिसद्दमुवणीया ॥ १७५७ ।। पुव्वकयसुकयवसओ, पयईए खीणमोहभावेण । अकसाया सुहचित्ता, अगव्विरी उवसमपहाणा ॥ १७५८ ।। जियरागदोसमोहेहिं जमिह चरणं जिणेहिं पन्नत्तं । तस्सायरणे ऊसुयमणा य विसएसु अविवासा ॥ १७५९ ।। कुप्पइ न सावराहे वि परियणे मन्नए य दासीओ। नियआओ अप्पणो च्चिय समाणवित्तीए सव्वाओ ।। १७६० ।। भणइ य तावेत्थ भवे, जाया हं चक्कवट्टिणो जाया । अहमवि अन्नम्मि पुणो, अहेसि अन्नन्नपरिणामा ।। १७६१ ॥ जम्हा एसो जीवो, नडो व्व नियकम्मसुत्तहारेण । विविहावत्थाणुगओ, भामिज्जइ भवमहारंगे ॥ १७६२ ।। तहा हि - कइया वि चक्कवट्टित्तणेण कइया वि रंकभावेण । कइया वि सामिभावेण दासभावेण कइया वि ॥ १७६३ ।। तिरियत्तणेण कइय वि, कइय वि बहुदुक्खनारयत्तेण । मणुयत्तणेण कइय वि, कइय वि पुण देवभावेण ॥ १७६४ ॥ कइया वि नरत्तेणं, कइया वि नपुंसगस्स रूवेण । कइया वि इत्थिभावेण रूविभावेण कइया वि ।। १७६५ ।। कइया वि विरूवित्तेण सोक्खजुत्तत्तणेण कइया वि । कइया वि दुक्खियत्तेण मुक्खभावेण कइया वि ।। १७६६ ।। कइय वि पंडिच्चेणं, कइय वि चउवेयबंभणत्तेण । कइय वि चंडालत्तेण खत्तियत्तेण कइया वि ॥ १७६७ ।। एमाइ विविहवत्था, नेवत्थच्छायछाइयसरीरो । भामिज्जइ एस जिओ कालमणतं सकम्मेहिं ।। १७६८ ।। एत्तो च्चिय परिणामी, जीवो दिट्ठो जिणिंदचंदेहिं । जुज्जति जओ वत्थाउ नेगरूवम्मि वत्थुम्मि ॥ १७६९ ।। अवि य - जो किरपहुत्तगत्तेण कढिणभणिईहिं परियणं भणिउं । करावइ निययआणं, आणाईसरियमयमत्तो ।। १७७० ॥ सो आभिओगियत्तं, मलिणप्पा चिक्कणं चिणेऊण । सव्वस्स पेसभावेण हीणयं लहइ परजम्मे ॥ १७७१ ॥ इय एवमाइ वयणाई जंपमाणी सया वि हु दमिती । इय इंदियाई अज्जं, इहागया तुम्ह वयणेण ।। १७७२ ।। जइ वि हु विरागभावे, वट्टइ जइ वि हु रसो न कीलाए । तुम्हाण तह वि आणा, अलंघणीय त्ति मन्ती ।। १७७३ ।। इहई च मुणिं एगं, फासुयदेसे सिलायलनिविटें । नाउं सहिवयणाओ अभिवंदणत्थं गया तस्स ।। १७७४ ।। समसीलयाइ जम्हा, पाएण जणस्स नायइ जणम्मि । बहुमाणो न हु विउसाण मुक्खलोयम्मि पडिबंधो । १७७५ ।। अभिवंदिऊण भत्तीए तं च परिवारपरिगया एसा । धरणीयलविणिविट्ठा, मुणिवयणं सोउमाढत्ता ॥ १७७६ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |