Page Text
________________
सिरिचंदप्पहजिणचरियं
तहा हि - सुरसिद्धखयरवंतरनागकुमाराइणो तहिं पत्ता । जे केइ कोउएणं ते सव्वे विम्हिया जाया ।। १७०५ ॥ अवि य - पडिसद्दरुद्धनहविवरपडहकरडामुइंगमाईण । आउज्जाणं सद्दो उच्छलिओ विविहपाडेहिं ॥ १७०६ ॥ लउडारससद्देणं संचलिओ तह कहं चि तत्थ वणे । जह तप्पेक्खयलोया संजाया चित्तलिहिय व्व । १७०७ ।। अन्नं च अंतरा अंतराओ पेक्खणयसद्दसम्मिस्सो । लउडारासो पडिहाइ सवणविवराण अमयं व ॥ १७०८ ॥ किंच - पडिवि पाडरमणीय पवरवायहिं आउज्जई । पाउसजलहरगहिर सरिण जणविरइय चोज्जइं ॥ १७०९ ।। लउडारासु य तयणुसारि तिंव किंवइ खेल्लहिं । जिंव लोयहं अन्नत्थ कहि वि मण नयण न डोल्लहिं ॥ १७१० एवं तालारासं पि बिंति नरवइगुणत्थुइपहाणं । आबद्धमंडलीया कत्थ वि रमणीओ कहिंचि नरा ॥ १७११ ।। सह नरवइणा एयम्मि अंतरे जे समागया कोई । नडनट्टजल्लमल्ला वेलंबगकहगलंखाई ॥ १७१२ ।। आरूढपोढगव्वा नियनियविन्नाणपयरिसगुणेण । ते उठ्ठिऊण सव्वे नरनाहं विन्नविति इमं ।। १७१३ ।। कीरउ देव ! पसाओ अम्हाण वि अवसरप्पयाणेण । नियविन्नाणं किंचि वि, दंसेमो जेण अम्हे वि ॥ १७१४ ।। तो नरवइणा दिट्ठीसन्नामेत्तेण ते अणुन्नाया । नियनियविन्नाणाई आढत्ता से पयंसेउं ।। १७१५ ॥ तहा हि - चक्कि व्व भरहसारा तरु व्व बहुपत्तपरियरपहाणा । अभिनयमाणा वरनाडयाई नच्चंति तत्थ नडा || १७१६ ।। थरहरियकड़ियडाबद्धरणिरघग्घरियजणियजणतोसा । सच्चवियविविहकरणा, कुणंति अन्ने उ नट्टविहिं ।। १७१७ ।। अवि य - वाइत्तगीयसंगयनट्टविहोणेण नट्टयजणस्स । तह रंजिओ नरिंदो, जह से अवणेइ दालिदं ॥ १७१८ ॥ अन्नत्थ वरत्ताखेलियाओ, तहिं चक्कई उल्लालंतियाओ। दक्खत्तगुणिण पुणु लिंतियाओ, गोलेहिं तहेव रमंतियाओ ॥ १७१९ छुरियाओ तह य गुणवंतियाओ, गोलयछुरियापयडंतियाओ। तिगजोगिण जणु रंजंतियाओ, नच्चंति वरत्तासंठियाओ ॥ १७२० बाहूरुयकरचरणाइ अंग अन्नोन्नगहणविरइयविचित्त । बहुबंधामल्ला वि रायपुरओ नियविन्नाणाई पयडंति ॥ १७२१ (गाहो) निज्जुद्धजुद्धकुसला, अन्ने अन्नोन्नमंगसंधीओ । टालंति संठवंति य, पुणो वि करकरणयाइसया ॥ १७२२ ॥
अवरे छुरियाओ गुणवंतिया वि बंधे कुणंति तह कह वि । जह तव्वसेण छुरिया जुया वि लोलंति भूमीए ॥ १७२३ ।। मुट्ठियमल्ला उ परे, परोप्परं मुट्ठिपहरणपसत्ता । बंधंति मुट्ठिपहरे करणविसेसेहिं उल्ललिउं ॥ १७२४ ।। केइ पुण विहियपडिमुहकारिमकयदंतवालनहनियरा । दंसेंति पेरणाई, बहूणि जणजणिय चोज्जाइं ॥ १७२५ ।। विविहाओ वयणचिट्ठाओ तह य संजणियगरुहासाओ । रमणिज्जाओ कुणंता, विदूसगत्तं पयंसंति ॥ १७२६ ।। कहगा कहति विविहा, कहाओ तह कह वि हावभावेहिं । जह अक्खित्ता ताओ लोयालिहिय व्व निसुणंति ॥ १७२७
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |