Page Text
________________
अजियसेनचक्कवडी
अवि य -- तरुणीचरणाहयदाविएहिं कयकिच्चयं पवालेहिं । मन्नतो व्व असोओ, त्ति एस सिद्धो फलं विणा वि तरू ॥ १६८२ (गीतिका) अवरं च - उच्चिणियफुल्लपल्लवफलं पि तरुणीजणेण पेच्छ वणं । तक्करफंसुल्लासियसुहं च अहियं वहइ सोहं ।। १६८३ लयतालमुच्छणाणुगयगेयमक्खित्तजुवजणसमूहं । गायंति मुहुरसरमेत्थ किन्नरीओ व्व अन्नाओ ॥ १६८४ ।। नच्चंति विविहभंगीहिं तरुणमणमोहणीओ काओ वि । करणंगहाररुइरं सुरंगणाउ व्व दिट्ठिसुहं ।। १६८५ ।। अन्ना वि पिययमवाइज्जमाणडक्कारयाणसारेण । खंभारंभनिभोरु रत्तप्पलरत्तकरचरणा ।। १६८६ ॥ उवेल्लमाणभुयजुयलरणिरमणिवलयतालरमणिज्जं । तह कह वि कुणइ देव्वं रंभ व्व सविब्भमं नर्से ।। १६८७ ।। उज्जाणकोउयागयदेवाण वि जह धुणावए सीसं । तज्जणियविम्हएण व, अणिमिसनयणत्तपत्ताण ।। १६८८ (विसेययं) तह माहविदक्खामंडवाइठाणेसु पउरलोयस्स । पुरओ पत्तयकोउयपलोयणक्खित्तचित्तस्स ।! १६८९ ।। पटुवायकुसलवाइयहुडुक्कमद्दलपयट्टवियनढें । वारंगणाहिं कत्थ वि, पारद्धं देवपेक्खणयं ।। १६९० ॥ छलिय व्व जच्चेणं नच्चइ तह कह वि कामिणी तत्थ । होडुक्कियं पि जंपेइ डक्कियं तं जह जणोहो ॥ १६९१ अवरं च - सुनिम्मला रत्तनहावलीओ, कुम्मुन्नयं हीओ वरंगुलीओ। सुरूवलच्छीजुयजंघियाओ, हत्थीसहत्थोवमऊरुयाओ ।। १६९२ सिलायलोदारनियंबिणीओ, विसालसोणित्थलमालिणीओ । गंभीरनाहिद्दहकुंडियाओ, सुसन्हरोमावलिमंडियाओ ।। १६९३ मुट्ठीपरिगिज्झवरोयरीओ, सुरेहरेहत्तयरेहिरीओ। उत्तुंगपीणत्थणवट्ठियाओ, पहाणकंबूवमकंठियाओ ।। १६९४ ।। बालप्पवालाहरउट्ठियाओ, कवोललायन्नअहिट्ठियाओ। विसिट्ठनासामुहमंडणाओ, सुकन्नपालीमणनंदणाओ। १६९५ वोसट्ठइंदीवरलोयणाओ, पहाण भूरेहपसाहणाओ। भालोवविट्ठालयपंतियाओ, सुकेसपासेहिं सहतियाओ ॥ १६९६ अन्नत्थ अन्ना उण चच्चरीओ, गायंति कन्नाण सुहंकरीओ। विचित्तपुप्फाभरणंकियाओ, पचक्ख मन्ने वणदेवयाओ ॥ १६९७ (कुलक) किंच - तरुसाहाबद्धं दोलएसु दोलतियाओ बालाओ । कत्थइ दीसंतसुरंगण व्व नहमुप्पयंतीओ ॥ १६९८ ॥ अवरोप्परखंधनिहत्तबाहु सह पिययमेण दोलाए । दोलंती हरगोरीण का वि लीलं विडंबेइ ॥ १६९९ ।। इय एवमाइबहुविहकीलारसनिब्भरं जणं राया । पेच्छंतो संपत्तो संतेउरपरिजणो तत्थ ।। १७०० ।। दठूणं तं जणो वि हु, समागयं सयलजणमणाणंदं । लउडारसतालारसमारंभइ विविहनट्टजुयं ॥ १७०१ ॥ कीलागिरिसिहरोवरि निवेसिए दिव्वफलिहमणिघडिए । सीहासणे निविट्ठो आयासगओ सुरिंदो व्व ॥ १७०२ ।। पटुपाडकुसलखेलयखेली लोएण तत्थ कत्थ वि य । लउडारसमारद्धं पेच्छइ संतेउरो राया ।। १७०३ ।। (जुयल) वत्थालंकाराई खेलयखेलीहिं जे कया तत्थ । लउडारसखेल्लणए तिहुयणमवि विम्हियं तेहिं ॥ १७०४ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |