Page Text
________________
६२
सिरिचंदप्पहजिणचरियं पसरंतपढमपाउसपओहरुद्दामसद्दबुद्धीए । उक्कंठाभरनिब्भरमणेयमोरे मुहरयंतो ॥ १६१० ॥ पायालविवरपरिपूरणेण संजणियसंभमाण तहा । उल्लासिंतो वियडं, फणाकडप्पं भुयंगाण || १६११ ।। ढालिंतो टंके गिरिवराण गयणंगणं च पूरंतो । उज्जाणगमणसंसी, समुट्ठिओ दुंदुभिनिनाओ ॥ १६१२ ।। (कलावयं) सुललियतमालयाणणसुसोहतिलयाहिं पयडमयणाहिं । अंतेउरियाहिं समं, मणमालाविन्भमधराहिं ॥ १६१३ ॥ कलकोइलरवरम्मं, महुसंगमजणियविब्भमसुसोहं । रमणं व काणणसिरिं, तो दटुं नरवई चलिओ ।। १६१४ ।। (जुयल) सामंतमंतिमंडलसेणाईवइसेट्ठिमाइलोया य । सह रन्ना नीहरिउं, लग्गा नियनियविभूईए ॥ १६१५ ॥ एत्थंतरम्मि उज्जाणमणुसरंतस्स पउरकामिणिजणस्स जे तइया । निब्भररसा विलासा, जाया अह के वि ते भणिमो ।। १६१६ एगा जंपइ महिला, हला हला कत्थ तं सि संचलिया। रणझणियनेउरारवआयडिढयहंससंघाया ।। १६१७ ॥ इयरा भासइ मुद्धे ! वसंतसिरिदसणूसुओ राया । उज्जाणं जाइ जओ, अहं पि तत्थेव संचलिया ॥ १६१८ ॥ अन्ना य भणइ हसिरी, सहि ! अन्नपहेण जाहि जइ तुरिया । उत्तुंगथणहरेणं, पेल्लाविल्लि तु मा कुणसु ।। १६१९ दठूण तरुणपुरिसं, किंचि वि मयरद्धयं व पच्चक्खं । सज्झसवसदरल्हसियं, संठवइ नियंसणं अन्ना ।। १६२० कलकणिरकंचिदामोवसोहिणा गुरुनियंबबिंबेण । तरुणजणमक्खिवंती, वच्चइ अवरा उ वरतरुणी ।। १६२१ ।। पियबाहुनिविट्ठकरा, अवरा मइरावएण घुम्मंती । पंचमगेयज्झुणिमणुगुणंतिया जाइ लीलाए ॥ १६२२ ।। पररमणिपलोयणखित्तचित्तमन्ना उ पिययमं नच्चा । अच्चासन्नट्ठियविडविखंधअंतट्ठिया होउं ।। १६२३ ॥ अवलोइयतच्चरिया, पयडीहोऊण गरुयकोवेण । मन्नाविते वि पिए, पडिवयणमदितिया जाइ । १६२४ ।। (जुयलं) अन्न पुण खंभनिहिएक्कथणलग्गए, पियभुयादडि घोलंति नियहत्थए । तुंबवीणाविणोयस्स जणमोहणं, धरइ लीलाए सोहं वयंती वणं ॥ १६२५ ॥ अन्नठाणम्मि अन्नेण अन्नयरिया, भणइ किं वयणि पई दिन्नकत्थूरिया । कमलभंतीए जं अलिउलं लग्गए, तुह मुहं मुद्धि ! तेणेव मंडिज्जए ।। १६२६ ।। किंच कंठम्मि जो तुज्झ हारो इमो, सो वि भारो व्व पडिहाइ मे उत्तमो । गमणसमसेयबिंदूहिं संपाइए, तस्स कज्जम्मि थणउवरि तरलच्छिए ।। १६२७ ।। अवरं च भणमि सुंदरि !, सवणंतविलग्गनयणजुयमेव । नीलुप्पललच्छि धरइ तुज्झ अवयंससि किमेए ।। १६२८ जावयरसो किमेसो, निहिओ रत्तुप्पलोवमपएसु । न हु पयइसुंदरे को वि कुणइ किर कारिमं सोहं ॥ १६२९ ॥ अन्नो य चच्चरीकोउएण पुरओ पियाए संचलिओ । गुरुथणहरपिहुलनियंबभारमंदयरगमणाए ॥ १६३० ।। कन्नुप्पलेण पहओ, तीए वलिऊण भणइ तं सुयणु ! । कोमलबाहुलया ते, न पीडिया ताडणसमेण ।। १६३१ ।। (जुयल) अवरो य गोत्तखलणेण सावराहं कले वि अप्पाणं । रुट्ठाए पियाए पसायणत्थमेवं पयंपेइ ।। १६३२ ॥ खमसु ममेक्कवराह, पुणो वि नाहं पिए ! इमं काहं । जं एकसि अन्नाणा, खलिए तश्विरमणं दंडो ॥ १६३३ ॥ इय चाडुवयणकुसलेहिं वल्लहेहिं विणोययंतीओ। अगणियमग्गसमाओ, इयराओ पहम्मि वच्चंति ।। १६३४ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |