Page Text
________________
अजियसेनचक्कवट्टी
एक्को उण मंदगई, दइयं उप्पाडिऊण बाहूहिं । तप्फाससुहविसज्जिय अद्धाणसमो लहुं वयइ ॥ १६३५ ॥ मंदपरिसक्किरि भणइ कोइ पुण पणइणिं जइ तुमं मे । आरुहसि मुद्धि ! खंधे, सुहेण ता वच्चसि वणम्मि || १६३६ चडिऊण तओ खंधे, पियस्स गव्वुद्धरा इमा जाइ । सोहग्गोवरिमंजरि इय जणवायं अणुसरंती ॥ १६३७ ।। सुललियगई न हंसा, मंथरगइणो न गयवई किंतु । सुनियंबो पयइगुरू, अलसगईसुं गुरू तासिं ॥ १६३८ ।। इय विविहविणोएहिं, जा वच्चइ केत्तियं पि भूभागं । नयरजणो ता पेच्छइ, पुरओ उज्जाणमइरम्मं ।। १६३९ ॥ सहयार-अंब-अंबिलिय-करुण-जंबीर-बिज्जऊरीहिं । खजूर-सज्ज-अज्जुण-पोप्फलिणी-नालिएरीहिं ।। १६४० नारंग-महुय-राइणि-टिंबरुय-कयंब-नीव-कडहेहिं । निंबउयनिम्ब-दाडिमिनिसरलसुरदारूनिचुलेहिं ।। १६४१ पुन्नाग-नाग-चंपय-करंज-कुरवय-असोय-बउलेहिं । मंदार-सिरीस-कवित्थ-असणतिणरायतिणिसेहिं ।। १६४२ कप्पूर-चंदणागरु-लवंग-कक्कोल-तगर-एलाहिं । जाईफल-हरियंदण-संताणय-पारियाएहि ॥ १६४३ ॥ अंकोल्ल-पिल्ल-सल्लड-कंपेल्लकसेल्लसेलपीलहिं । अक्खोड-तिलय-वायम-जंब-कोसंबखयरे पिप्पल-पलास-उंबर-वड-काउंबरि-पिलिक्ख-कुडएहिं । करमंदि-फणिस-पिप्पलि-कंबीरिय-मिरिय-कडुयाहिं ।। १६४५ हरडइ-वहेडयामलिय-पाणकुवली-तमाल-तालाहिं । अंजण-सोहिंजण-कंचणार-कणियार-सागेहिं ।। १६४६ ।। एमाइ विविहरुक्खेहिं पवणहल्लंतसाहबाहूहिं । आगमणत्थं सन्नं व कुणइ जं लोयनिवहस्स ॥ १६४७ ।। किंच - कुंद-मुचकुंद-वेइल्ल-पारत्तिया, जूहिया-जाइ-कणईरि-सयवत्तिया । दमण-जासुयण-अइमुत्त-नेमालिया, केयई-कुज्ज-कणियार-कोरिंटिया ॥ १६४८ ।। एवमाईण विडवीण जे पुप्फया, तत्थ दीसंति वन्नड्ढगंधड्ढया । तत्थ लग्गति जे भमरसंघायया, ताण सद्देण जं गायई सव्वया ॥ १६४९ ।। अवि य - सारस-हंस-बलाया-कारंडव-कुंच-चक्कवायाण । बप्पीहयाडिकोइल-सिहंडिचरणाउहचिडाण ॥ १६५० ॥ अन्नाण वि सुयसालहियमाइविहगाण विविहरूवाण । कोलाहलच्छलेणं, जं आहवइ व्व पहियगणं ।। १६५१ ॥ अन्नं च - वाउपेल्लंतसाहुलियकयतंडवा, जत्थ दीसंति दक्खाण वरमंडवा । सामलत्तेण कायं पि नीसंकया, मुद्धसिहिनिवहुनटुं कराविंतिया ॥ १६५२ ।। नागवल्लीओ अन्नत्थ घणपत्तया, छइयनहविवरनन्नीलवरपट्टया । जाण छायासु कोलंति नरमिहुणया, पवरसुहबुद्धिआ बद्धआवाणया ।। १६५३ ।। जं च उम्मिल्लपुप्फेहिं नयणेहिं वा, पवणहल्लंतपल्लविहिं हत्थेहिं वा । नाइ जोएइ तं समुहर्मितं जणं, हरिसभरनिब्भरं नच्चई तक्खणं ।। १६५४ ॥ तत्थ सव्वत्तुए पत्तु उज्जाणए, सयलवणदेवयावाससम्माणए । गुरुविभूईए राया सअंतेउरो, मंतिसामंतमाईजणाणं पुरो ॥ १६५५
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |