Page Text
________________
अजियसेनचक्कवट्टी अंके निवेसिऊणं, हरि व्व लच्छि मणोभिमणदइयं । वीसत्थो जंपइ पणयसारवयेणेहिं हट्ठमणो ।। १५८२ (चक्कलयं) पेच्छ पिए एस महू, उववणलच्छीए सणकएण । परहुयरवच्छलेणं, सिणिद्धमेत्तो व्व मं भणइ ॥ १५८३ ।। सीमंतिणि व्व वरतिलयपत्तसविसेससोहमणुपत्ता । नयणुज्जाणस्स सिरी, अणवज्जो जुज्जए दटुं ॥ १५८४ ।। ता गंतूण उववणे, मलयानिलनच्चमाणसाहिगणे । वम्महसिणिद्धबंधुं, माणामो संपयं सुणसु ॥ १५८५ ॥ तत्थ तुमं पि किसोयरि ! गया वसंतोचिएण वेसेण । कुण नयणमहं वणदेवयाण पच्छन्नरूवाण ।। १५८६ ॥ किंचि तुह केसपासस्स सोहमसमं पलोइय सिहंडी । लज्जाए नियकलावम्मि तत्थ मोत्तूण नट्टविहिं ॥ १५८७ ॥ वच्चेज्जन्नत्थ अओ, सकेसपासं नियंबबिंबस्स । चुंबणसीलं चीणंसुएण पिहियं करेज्जासु ॥ १५८८ ॥ जेणम्ह नयणमणहारि तस्स नट्टे पलोयमाणाणं । होज्जा न अंतरायं, मयच्छि ! अच्छिन्नवंछाण ।। १५८९ ।। (विसेसयं) अन्नं च तुज्झ वाणिं, महुरत्तं सिक्खिउं व अइनिहुयं । कोइलकुलं सुणेही चूयं कुरगासनीसदं ॥ १५९० ।। तुह निसुणंती तह हंसगमणि ! मणिनेउराण झंकारं । मुहुपाणपरा किर लज्जिय व्व रणिही न भमराली ॥ १५९१ अवि य तुह मेहलारावसुणणसंजायसोक्खसंभारो । सारसगणो वि मंताविट्ठो व्व न मुंचिही पासं ॥ १५९२ ।। नयणप्पहाहिं तह कुवलयच्छि ! तुह पेच्छिरीए तरुलच्छी । धणभूमिउ ते लहिस्संति नीलनलिणोवहारसिरिं ।। १५९३ तुह सुमुहि ! चरणपरिताडणाइ होहिंति दो य समतुल्ला । कंकेल्ली नवकुसुमो, अहं च रोमं च कंचुइओ ।। १५९४ दटुं च तुमं सुंदरि ! निसग्गमंथरगईए हिंडती । वणदीवियासु हंसीकुलं पि सीलत्तणमुवेही ।। १५९५ ॥ वारं वारं करताडिओ वि विदुमसमम्मि तुह अहरे । लग्गंतो भमरजुवा, असोयनवपल्लवतिसाए ॥ १५९६ ॥ कस्स न काही सुंदरि ! वणम्मि वयणं पयट्टहासरयं । अमुणियवत्थुपवित्तीए अहव भण को न हसणिज्जो। १५९७ (जुयलं) पेरंतजायतरुजालरुद्धचंचंतरविकरेसुं पि । मुद्धच्छि ! वणंतलयाहरेसु अइगुविलरूवेसु ॥ १५९८ ॥ मन्ने मुहिंदुनिम्मलकंतीए पडिहणिज्जमाणो ते । बहलो वि अंधयारो, थेवं पि न अम्ह परिभविही ॥ १५९९ ।। (जुयल) अवरं च वयणससहरमणहरलायन्नजोण्हमुद्धमणो । वरतणुबओरनियरो, वि तुज्झ पासं न मुंचिहइ ॥ १६०० ।। चरणाण उप्पलेसुं, नियंबबिंबस्स दीहियापुलिणो । हत्थाण पल्लवेसुं, बाहूण मुणालदंडेसु ॥ १६०१ ॥ वयणस्स पंकएसुं, भूभंगाणं तरंगभंगेसु । गंडाण चंपएसुं, दसणाण विइइल्लमउलेसु ।। १६०२ ।। कयलीसु ऊरुयाणं, लयासु देहस्स अलिसु मयणाण । वरकुसुमगोच्छएसुं, थणाण बिंबेसु अहरस्स ।। १६०३ ।। हरिणीसु पेच्छियाणं, विलासु दोलासु सवणपालीणं । केययतरुम्मि नासाए मोरबरिहेसु चिहुराण ॥ १६०४ ॥ इय एवमाइसु निसग्गसुरहिणा मारुएण वयणस्स । पेसलयंती मलयानिलस्स सोरब्भसंपत्तिं ॥ १६०५ ॥ विहरसु विभिन्नवत्थूसु तेण सारिच्छदसणम्मि तुमं । सुहमहियमणुहवंती, सह सुयणु ! मए उववणम्मि ॥ १६०६ (कुलयं) खणमेत्तमेवमाभासिऊण महुरवयणरयणाए । एगंतठियो राया, नियदेविं गरुयराएण ।। १६०७ ॥ आघोसणं करावइ, चउक्कतियचच्चराइठाणेसु । उज्जाणगमणकज्जं, उद्दिसिय जणस्स नयरम्मि ।। १६०८ ।। (जुयलं) करडयडगलंतमए, पडिगयगलगज्जियस्स संकाए । जणयंतो कोवभरेण निब्भरे तयणु दिसकरिणो ।। १६०९ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |