Page Text
________________
सोमाकहा
एत्तो भावणधम्मं, भणामि ताओ दुवालस च्चेय । कम्मखयट्ठा जाओ, हवंति भाविज्जमाणाओ ॥ १३७० ।। पढमा अणिच्चरूवा, बीया अस्सरणभावणा तइया । संसारभावणा वि य, होइ चउत्थी उ एगत्तं ॥ १३७१ ।। अन्नत्तभावणा पंचमी उ छट्ठी उ होइ असुइत्तं । सत्तमियासवचिंता, संवरचिंता य अट्ठमिया ।। १३७२ ।। निस्सरणभावणा उण, नवमी लोगस्स भावचिंता य । दसमी एक्कारसमी, बोहीए दुल्लहत्तं तु ॥ १३७३ ।। जिणवरभणियत्थाणं, जा पुण सुपरूविय त्ति चिंता य । एसा दुवालसी मुणिवरेहिं सुहभावणा भणिया ॥ १३७४ एवं संखेवेणं, भावणधम्मो वि साहिओ तुज्झ । एएणं कहिएणं, कहिओ धम्मो चउविहो वि ॥ १३७५ ॥ एवं च सुयणु ! परिभाविऊण, जइ तुज्झ किं पि अभिरुइयं । धम्माणुट्ठाणं ता, गहिउं भावेण पालेसु ॥ १३७६ इय सोऊण पवत्तिणिवयणं उल्लसियसुद्धपरिणामा । कम्मखओवसमेणं, सोमा विणएण भणइ इमं ॥ १३७७ ।। जारिसओ जइ भेओ, धम्मो भयवइ ! परूविओ तुमए । सो तुज्झ पसाएणं, अभिरुइओ निवियप्पो मे ।। १३७८ ता काऊण महंत, अणुग्गहं देसु पंचणुव्वइयं । सम्मत्तमूलसावगधम्ममवत्थोचियं मज्झ ॥ १३७९ ।। तो तव्वयणायण्णणपहट्ठचित्ता पवत्तिणी झ त्ति । सम्मत्तजुयाणुव्वयगहणं कारवइ तं विहिणा || १३८० ।। इयरी वि अप्पमत्ता, पडिच्छिउं पालई विसुद्धमणा ! जा कित्तिए वि दिवसे, ता जं जायं तयं सुणह || १३८१ संजायं तीसे गुरुयणस्स अप्पत्तियं अइमहंतं । भणइ य स कीस धम्मो, पडिवन्नो सियवडाण तए ।। १३८२ ।। अम्हं कुलक्कमेणं. समागओ माहणाण वरधम्मो । ता तम्मि थिरा होउं, मुंच इमं कवडधम्म ति ।। १३८३ ॥ तो चिंतियं इमाए, उत्तरदाणं गुरुसु न हु जुत्तं । आराहणिज्जलोए, जओ न पडिकूलणा जुत्ता ॥ १३८४ ।। अन्नं च गुरुयणं पि हु, जइ नेमि पवत्तिणीए पासम्मि । ता मा कयाइ होज्जा, तस्स वि तइंसणे बोही ।। १३८५ ता अवसरोचियं चिय, सदुत्तरं किं पि देमि एयाण । इय चिंतिऊण भणियं, मुयामि धम्मं अहं एयं ।। १३८६ ।। किंतु जहिं पडिवन्नो, जाण सयासम्मि ताण पच्चक्खं । तुन्भेहिं सक्खिएहिं, चयामि ता एह तत्थेव ॥ १३८७ ।। एवं भणिए तीए, पडिवन्नं से गुरूहिं तं वयणं । तत्तो गुरुयणसहिया, संचलिया साहुणिसमीवं ॥ १३८८ ॥ एत्थंतरे य एक्कम्मि मंदिरे वइससं अइमहंतं । हिंसा अणिवित्तीए, संजायं कुलविणासयरं ।। १३८९ ।। मिलिओ पभूयलोगो, परोप्परं भणइ एस किं रोलो । संजाओ एत्थ गिहे, ता अन्नो कहइ अन्नेसिं ॥ १३९० ।। भो भो वाणियगघरं, एयं महिला य आसि अइ दुट्ठा । पंचत्तगए घरसामियम्मि भिच्चम्मि अणुलग्गा ॥ १३९१ तीसे य आसि पुत्तो, संकाए तस्स तीए निव्विग्घो । होइ न रइसुहलाभो, तेण समं सो तओ भणिओ ॥ १३९२ जइ वावायसि कह वि ह मज्झ सयं तो तए समं एत्थ । रइसोक्खमविग्घेणं, संपज्जइ अन्नहा नेय तो तेण इमा भणिया, जइ एवं तो मए समं एसो । पेसिज्जउ किं पि मिसं, काऊण कहिं पि गामम्मि ।। १३९४ मग्गम्मि जेण कत्थ वि, सुन्ने लहिऊण किं पि से छिदं । काहामि पाणघायं, एवं काऊण संकेयं ।। १३९५ ।। गामंतरम्मि चलिओ, एसो जणणीए निययपुत्तो वि । तेण समं पट्ठविओ, काऊण मिसंतरं किं पि || १३९६ ।। उवलहिउं वुत्तंतं, कत्तो वि हु सो अभिन्नमुहराओ । संचलिओ तेण समं, कत्थ वि लहिऊण पत्थावं ॥ १३९७
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |