Page Text
________________
३८
सिरिचंदप्पहजिणचरियं
रमणालवालउग्गयरोमलयामणहरेण मज्झेण । तिवलीतरंगपरिसंगएण अहियं विरायंति ।। ९७२ ॥ वियडं नियंबबिंबं, वम्महजूयारजूयफलयं व । अक्खक्खिवणसमत्थं, उव्वहमाणिं अइससोहं ।। ९७३ ।। मयणभवणस्स सरणा वंदणमालाए खंभजुयलं व । करिकरदंडसरिच्छं, धरमाणिं रम्ममूरुजुयं ॥ ९७४ ।। लायन्नसरसियाए, रत्तुप्पलसच्छहेहिं चरणेहिं । अरुणंगुलिदलनहमणिकेसररुइरेहिं रेहति ।। ९७५ ।। इय एरिसवररूवं, तं विहिउं मज्जमंसमाणीयं । जं पुव्वं तं भुंजइ, तीए समं गरुयपणएण ॥ ९७६ ॥ रइसोक्खं अणुहवइ य, खट्टगं कुंभयारगेहम्मि । मह वीसरियं ति भणित्तु उठ्ठिओ झ त्ति तट्ठाणा ॥ ९७७ ॥ निग्गच्छंतो भणइ य, जाव अहं एमि ताव तत्थेव । सुयणु ! तए ठायव्वं, इय भणिउं जाइ तुरियपओ ।। ९७८ मह संझं काउमणे, तम्मि गए सिवतलायसंमुहम्मि । इयराइ वि पुव्वं चिय, उप्पाइय कह वि वीसंभं ॥ ९७९ ।। तस्स सयासाओ वरा, तयत्थसंसाहणी महाविज्जा । जा संगहिया तीसे, पहावओ सा वि तह चेव ॥ ९८० ।। आलिहिय मंडलाओ ग्गिलित्तु अंगुट्ठमाणवरपुरिसं । सिंचित्तु कमंडलुपाणिएण से कुणइ तरुणत्तं ।। ९८१ ।। अणुरूवरूवलायन्नपुन्ननीसेसअवयवधरेणं । तो तेण समं सयगुणपीइपरा रमइ सा तत्थ ॥ ९८२ ।। रमिऊण सइच्छाए, आगमणे तस्स समयमवगम्म । लहुयं काऊण इमं पुरिसं निग्गिलइ सहस त्ति ॥ ९८३ ।। आगंतूणं इयरो वि झ त्ति तह चेव लहुयरं काउं । तीए सरीरं निग्गिलिय अंतरे पविसइ मढस्स । ९८४ ॥ एवं च मूलदेवो, सव्वं तव्वइयरं पलोएइ । पायारसंधिसंठियपिप्पलतरुसिहरमारूढो ॥ ९८५ ।। तो विम्हिओ मणेणं, उत्तरिऊणं च पिप्पलाओ तओ । निययगिहं गंतूणं, रयणीसेसं अइगमेइ ॥ ९८६ ॥ आयारिंगियमाईहिं जाणिउं चवलियं नियपियाए । बीयं च तओ पुच्छइ, साहइ सव्वं पि सा भीया ॥ ९८७ ।। अह जायम्मि पभाए, विक्कमसूरस्स राइणो पुरओ । गंतूण भणइ देवेण ताव अम्हे कया गिहिणो ।। ९८८ ॥ ता अम्ह उवरि गरुयं, देवो काउं पसायमेत्ताहे । भुंजउ अम्हाण गिहे, पडिवन्नं कह वि तं रन्ना ॥ ९८९ ।। तो उट्ठिऊण वुच्चइ पासम्मि महव्वइस्स तं पि तहा । भोयणकारवणत्थं, निमंतई निययगेहम्मि ॥ ९९० ।। तो भोयणस्स समए, समागओ तग्गिहं नरवरिंदो । विन्नवइ मूलदेवो, पयओ होऊण तं च तहिं ॥ ९९१ ।। देवस्स पायपंकयजुयलप्फंसेण तह महा जइणो । मह गेहं होउ पवित्तमेयमिय नाह बुद्धीए ॥ ९९२ ।। तुब्भे निमंतिया भोयणत्थमन्नो कवालसिहनामो । एगो य महव्वइओ निमंतिओ तुह पसाएण ॥ ९९३ ।। तस्स य भोयणठाणं, ववहियमेवप्पकप्पियं देव ! । एएण अप्पसाओ, कायव्वो तन्न मज्झुवरि ।। ९९४ ।। इय वोत्तूण नरिंद, भोयणसालाए नेइ हट्ठमणो । तत्थ य रन्नो जोग्गं, जह ठवियं आसणं पवरं ।। ९९५ ॥ तह अन्नाइ वि दो आसणाई थालाई तिन्नि य कमेण । वरकणयमयाइं दवावियाई तह अत्तणो चेवं ॥ ९९६ !! तिन्नेव आसणाई, तहेव भुंजइ ठिईए जइणो वि । रन्नो दिट्ठिनिवाए, कयाइं थालाई कलियाई ॥ ९९७ ।। तइंसियासणवरे, उवविसिउं नरवई तओ भणइ । भो मूलदेव ! एवं, मह नियडे किंतु कयमेयं ॥ ९९८ ।। आसणदुगमन्नं पि हु, तह थालाईणि भोयणवराई । तो भणइ मूलदेवो, सुण देव ! इहत्थि विन्नत्ती ।। ९९९ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |